Շինարարների միության նախագահ Գագիկ Գալստյանը, ելույթ ունենալով Հայաստանի ճարտարապետության ազգային թանգարան-ինստիտուտի ցուցասրահում այսօր՝ Հայաստանի Հանրապետության անկախության 20-ամյակին նվիրված ճարտարապետական աշխատանքների ցուցահանդեսում, մասնավորապես ընդգծեց, որ անկախության տարիները շրջադարձային են եղել քաղաքաշինության ոլորտի համար:
«Դրանք նշանավորվեցին շինարարության տեմպերի աննախադեպ աճով, ներդրումային խոշոր ծրագրերի իրականացմամբ, քաղաքաշինական ու ճարտարապետական մեծ արժեք ներկայացնող շենքերով ու շինություններով, սոցիալական նշանակության բազմաթիվ օբյեկտների կառուցմամբ»,- ասաց նա` հավելելով, որ Երևանն արդյունքում դարձել է «ավելի գեղեցիկ ու գրավիչ»:
Գուցե Երևանն առավել գրավիչ է դարձել, գուցեև շինություններն աչքի են ընկնում իրենց ճարտարապետական կառուցվածքով ու հետաքրքիր մտահղացմամբ, սակայն եթե հաշվի առնենք, թե որտեղ ու երևանյան հին ճարտարապետական ինչ նմուշների վրա են կառուցված, ապա դրանց արժեքը զգալի նվազում է: Նախագծված շենքերի մի մասը ներկայում վեր է խոյանում Երևանի փոքր կենտրոնում` կանաչ տարածքների հաշվին: