«Առաջին նախագահի չմասնակցելը ես հասկանում եմ, քանի որ նա 2007թ. մարտահրավեր է նետել անկախ Հայաստանում այսօր գործող կարգին և այն ամբողջ կեղծիքին ու ստին, որն այսօր գոյություն ունի Հայաստանում, և որը հետո նաև ապացուցվեց 2008թ. ընտրություններով»,- «Առաջին լրատվականի» հետ զրույցում անդրադառնալով այն հանգամանքին, որ ՀՀ առաջին և երկրորդ նախագահները չեն մասնակցելու ՀՀ անկախության 20-ամյակի տոնակատարության պաշտոնական միջոցառումներին՝ կարծիք հայտնեց հրապարակախոս Տիգրան Պասկևիչյանը:
Հարցին, թե հնարավոր չէ՞ հանուն անկախության 20-ամյակի գոնե մի կողմ դնել եղած խնդիրները՝ Պասկևիչյանը պատասխանեց, որ դա անհնարին է, քանզի թեկուզ մեկ օրով համարել, որ կեղծիք չկա՝ ինքնին մեծ կեղծիք է:
Ռոբերտ Քոչարյանի հանրապետությունից բացակայելու պատճառով միջոցառումներին ներկա չգտնվելու վերաբերյալ էլ Պասկևիչյանն ասաց, որ սեփական երկրի նկատմամբ հարգանք ունեցող նախագահը պետք է այդ օրերին հանրապետությունում լիներ: Նա նաև նկատեց, որ եթե չի մասնակցում, և դա պատճառաբանում են հանրապետությունում չլինելով, ապա կարելի է ենթադրել, որ ինչ-ինչ ներքին հաշիվներ կան, և հենց դրա համար է, որ չի մասնակցելու միջոցառումներին:
