Ռուսաստանի եւ Թուրքիայի փոխհարաբերությունում «անսպասելիորեն» առաջին պլան է եկել փողը: Մասնավորապես, բարդացել է երկու երկրների միջեւ ֆինանսական օպերացիաների իրագործումը, քանի որ թուրքական բանկերը երկրորդային պատժամիջոցներից խուսափելու համար հրաժարվում են այդ օպերացիաներից: Իրավիճակի բարդությունը խոստովանում են ռուսաստանցի գործարարներն ու անգամ դիվանագետները:
Այդ հանգամանքը ռուս-թուրքական հարաբերության օրակարգ է բերել համատեղ բանկի ստեղծման գաղափարը, որի միջոցով կողմերը պետք է ապահովեն ֆինանսա-տնտեսական փոխհարաբերության կայունություն: Խնդրի կարեւորության մասին խոսել է նաեւ Կրեմլի ղեկավար Պեսկովը, հայտարարելով, որ բանկի հարցը կլինի ՌԴ նախագահ Պուտինի Թուրքիա կատարելիք այցի օրակարգում: Փողի խնդիրը կբաժանի՞, թե՞ կմիավորի Թուրքիային ու Ռուսաստանին: Այդ հանգամանքը անշուշտ իր ազդեցությունն է թողնելու նաեւ Կովկասի ռազմա-քաղաքական միջավայրի վրա, հաշվի առնելով դրա հանդեպ ռուս-թուրքական հարաբերության կարեւորությունը, ինչը թերեւս չունի ավելորդ հաստատման կամ մեկնաբանության կարիք:
Այս ֆոնին, ի դեպ, ուշագրավ են տեղեկությունները, որ վերաբերում են Հայաստանի ֆինանսա-բանկային սեկտորին: Իհարկե այստեղ «զուգորդումը» ոլորտային է, բայց չկա որեւէ հանգամանք, որը մատնացույց կանի որեւէ փոխկապակցվածության, սակայն Հայաստանի ֆինանսաբանկային սեկտորի վերաբերյալ հայկական մամուլում եղել է երկու էական տեղեկություն: Հայաստանում ավելի քան երկու տասնամյակ գործող բրիտանական HSBC-ն՝ Հայաստանում գործող ըստ էության ամենահեղինակավոր, նաեւ միջազգային բանկային համակարգում խոշորագույն համարբող բանկերից մեկը հայտարարել է, որ վաճառում է հայաստանյան մասնաճյուղը, իսկ գնորդ բանկն Արդշինբանկն է, որտեղ ի դեմ մինչ կառավարության փոխվարչապետի պաշտոնում հայտնվելն ղեկավար կազմում աշխատել է Մհեր Գրիգորյանը՝ 2011-18 թվականներին զբաղեցնելով բանկի վարչության նախագահի պաշտոնը:
Գործարքն իհարկե դեռ պետք է արժանանա կարգավորող մարմնի հավանության: Ի դեպ, հարկ է նկատել, որի բրիտանական բանկը ամբողջ աշխարհում իր մասնաճյուղերի օպտիմալացման քաղաքականության մասին հայտարարել է դեռեւս 2020 թվականից: Մյուս տեղեկությունը այն է, որ Հայաստանի բանկային համակարգի մյուս խոշոր բանկը՝ Ամերիաբանկը, որի հիմնադիրներից եւ բաժնետերերից է նաեւ Արցախի նախկին պետնախարար, գործարար Ռուբեն Վարդանյանը, որն այժմ ադրբեջանական գերության մեջ է, կարող է վաճառվել Վրաստանի խոշորագույն բանկերից մեկին՝ Bank of Georgia Group PLC-ին: Վրացական բանկը պաշտոնապես հաստատելլ է, որ վարում է Ամերիաբանկի բաժնետոմսերը գնելու բանակցություն: