Բողոքող լեհ ֆերմերները փետրվարի 20-ին ամբողջությամբ կարգելափակեն Ուկրաինայի հետ սահմանը: Այս մասին հայտնում է «ՌԻԱ նովոստի»-ն՝ վկայակոչելով «Սոլիդարնոստ» գյուղատնտեսության աշխատողների արհմիությունը:
Փետրվարի 9-ին սկսվել է ֆերմերների ընդհանուր բողոքի ակցիան։ Նրանք բողոքում են ամբողջ երկրում ՝ փակելով Ուկրաինայի հետ սահմանի անցակետերի ճանապարհներն ու մուտքերը:
Արհմիությունը պարզաբանում է, որ փետրվարի 20-ին կարգելափակվեն ոչ միայն սահմանային անցումները, այլև տրանսպորտային հանգույցներն ու դեպի փոխաբեռնման կայաններ և ծովային նավահանգիստներ տանող ճանապարհները:
Լեհ-ուկրաինական հարաբերությունները զգալիորեն բարդացել են ուկրաինական հացահատիկի նկատմամբ էմբարգոյի պատճառով: Եվրահանձնաժողովը 2023 թվականի սեպտեմբերի 15-ին որոշեց չերկարաձգել Ուկրաինայի չորս անուն գյուղատնտեսական արտադրանքի ներմուծման սահմանափակումները ԵՄ մի քանի սահմանամերձ երկրներ, բայց Կիևին պարտավորեցրեց միջոցներ ձեռնարկել արտահանման վերահսկման համար:Դրանից հետո Սլովակիայի, Հունգարիայի և Լեհաստանի իշխանությունները հայտարարեցին, որ միակողմանիորեն երկարացնում են արգելքը: Ուկրաինան այդ կապակցությամբ բողոք է ներկայացրել ԱՀԿ: Ի պատասխան ՝ ԵՄ երեք երկրներ հայտարարել են, որ բոյկոտելու են ուկրաինական հացահատիկի հարցով համակարգող հարթակի նիստերը:
