Երևանի Մոր և մանկան առողջության կենտրոնում անպտղության հաղթահարման ծրագրի 20-ամյակին նվիրված միջոցառումը մեկնարկեց տվյալ ծրագրի կայացման ու զարգացման ակունքներում կանգնած անձանց հուշամեդալներով պարգևատրմամբ:
ՀՀ առողջապահության նախարար Անահիտ Ավանեսյանը հեղափոխական ձեռքբերում համարեց Հայաստանում առաջին անգամ 2003 թվականին Մոր և մանկան առողջության պահպանման գիտահետազոտական կենտրոնում իրականացված արտամարմնային բեղմնավորման մեթոդի կիրառմամբ եռյակի ծնունդը:
«Տարիների ընթացքում օժանդակ վերարտադրողական տեխնոլոգիաների կենտրոններ ստեղծվեցին և երկրում անպտղության բուժման համար կիրառվող բոլոր տարատեսակները դարձան հասանելի, բազմաթիվ ընտանիքներ համալրվեցին:
Բայց քանի որ օժանդակ վերարտադրողական տեխնոլոգիաների կիրառումը, հատկապես` արտամարմնային բեղմնավորումը, բավականին թանկարժեք է և ֆինանսապես ոչ բոլորի համար հասանելի, պետությունը սկսեց աջակցության ծրագրեր՝ սոցիալական որոշ խմբերի համար: 2019 թվականից անպտղության բուժման պետական աջակցության ծրագրի շահառուների ցանկը զգալի ընդլայնվեց` ներառելով սահմանամերձ շրջանների և զինծառայողների ընտանիքներին, հետո նաև 44-օրյա պատերազմի հետևանքով իրենց զավակներին կորցրած կանանց: Իսկ նախորդ տարին անպտղության հաղթահարման ծրագրի ընդլայնման առումով նշանակալի էր»,- մանրամասնեց նախարարը:
Անպտղություն ունեցող բոլոր զույգերը, կարող են օգտվել ծրագրից, իհարկե, որոշակի տարիքային սահմանափակմամբ` ելնելով բժշկական նկատառումներից: Զոհված զինծառայողների ծնողների դեպքում այդ տարիքային սահմանափակումը չի գործում: Նրանց դեպքում պետությունը ֆինանսավորում է անպտղության բուժման համար անհրաժեշտ բոլոր տարբերակները` ներառյալ սեռաբջիջների դոնորություն և փոխնակ մայրություն:
Մինչ օրս պետական ֆինանսավորմամբ վերարտադրողական օժանդակ տեխնոլոգիաներով մատուցված ծառայությունների շնորհիվ 451 երեխա է ծնվել, որից 59-ը` զոհված զինծառայողների ընտանիքներում: Նրանցից 159-ը նախորդ տարվա ծնվածներն են:
«Պետությունը, հատկապես վերջին մարտահրավերներից հետո, մեր առջև դնում է վերարտադրողական ներուժը իրացնելու հանձնարարական, ուստի, անպտղության հաղթահարման պետական ծրագրի ընդլայնումը լինելու է շարունակական, ունենք նաև շահառուների նոր խմբեր ավելացնելու հանձնառություն»,- նշեց նա:
Ավանեսյանը եզրափակելով ասաց՝ ծառայությունները պետք է հասանելի լինեն Հայաստանի քաղաքացիներին, բայց նաև մեծ պոտենցիալ են տեսնում Հայաստանը բժշկական տուրիզմի համար հետաքրքիր ուղղություն դարձնելու մեջ: Նա նաև ընդգծեց՝ ոլորտի լիարժեք զարգացումն ապահովելու համար անհրաժեշտ է մասնագետների բավարար քանակ ապահովել, որի նպատակով քաղաքականության մեջ որոշակի փոփոխություններ կմտցվեն, որը, իր համոզմամբ, զարգացման նոր խթան կհանդիսանա:
Պրոֆեսոր Գեորգի Օկոևը պատմեց արտամարմնային բեղմնավորման գաղափարը Հայաստանում առաջին անգամ կիրառելու մանրամասները: Նշեց առկա մարտահրավերները, դրանց հաղթահարմանն ուղղված իրենց լուծումները: Նրա խոսքով՝ մեկ այլ մարտահրավեր էր մարդկանց կարծիքը այս մեթոդի վերաբերյալ:
«2003 թվականին Հայաստանում գրանցվեց այդ մեթոդով առաջին հղիությունը, որը լուծվեց հաջողությամբ: Չնայած, որ բժշկությունը ուներ այդ եղանակով ծնված շուրջ 1.5 միլիոն երեխայի փորձ, որն ապացուցում էր, որ նրանք որևէ բանով չեն տարբերվում, միևնույն է, մարդիկ մտածում էին, որ երեխաները, որոնք այդ տարբերակով ծնվում են, ինչ-որ բանով տարբերվում են»,- ասաց պրոֆեսորը:
Բժշկագիտության զարգացման գործում ներդրած գնահատելի ավանդի համար բժշկության գիտությունների դոկտոր պրոֆեսոր Գեորգի Օկոևին շնորհվեց շնորհակալագիր: Արտամարմնային բեղմնավորման կայացման զարգացման ակունքներում կանգնած անձինք՝ Գեորգի Օկոևը, սաղմնաբան Կարեն Ջինանյանը և 2003 թվականին Հայաստանում առաջին անգամ արտամարմնային բեղմնավորումով ծնված եռյակը պարգևատրվեցին հուշամեդալներով:
