Regnum-ի մեկնաբանի գնահատմամբ՝ «փետրվարին կայանալիք Էրդողան-Պուտին բանակցությունները չեն շրջանցի Հայաստան-Ադրբեջան կարգավորման հարցը, կողմերը շահագրգռված են, որ ՆԱՏՕ-ն մուտք չունենա այնտեղ»: Որ Թուրքիան ՆԱՏՕ-ի անդամ է եւ արդեն իսկ ներկա է Հարավային Կովկասում, դա, ինչպես միշտ, ռուսաստանյան քարոզչությունն անտեսում է: Բայց իրական քաղաքական ռեժիմում այդ հանգամանքն այլեւս գործնական նշանակություն չունի:
Իրականություն է, որ անցյալ սեպտեմբերին Սոչիում Պուտին-Էրդողան հանդիպումից երկու շաբաթ անց Ադրբեջանը Լեռնային Ղարաբաղի հայ բնակչության դեմ ահաբեկչական պատերազմ սանձազերծեց եւ իրականացրեց էթնիկ զտումներ, իսկ ՌԴ խաղաղապահ զորախումբը մնաց դիտորդի դերում: Ռուսաստանի եւ Թուրքիայի նախագահների հերթական բանակցությունների մասին տեղեկատվության հրապարակայնացումից հետո Ադրբեջանը հատուկ նշանակության ստորաբաժանումների երկու զորավարժություն է անցկացրել:
Առաջինի մարտական առաջադրանքն էր՝ «ճեղքել պայմանական հակառակորդի պաշտպանական գիծը, ոչնչացնել հրամանատարական կետը եւ անցնել բնակավայրի պայմաններում գործողությունների»: Երկրորդ զորավարժությամբ խնդիր է դրվել «ստուգել հատուկ նշանակության ստորաբաժանման բարձր լեռնային եւ սառնամանիքի պայմաններում մարտական պատրաստության աստիճանը»: Իհարկե, պաշտոնական քարոզչությունը դա ներկայացնում է որպես «ուսումնա-վարժական եւ պլանային միջոցառում»:
Turan գործակալությունը վկայակոչում է AzTV պետական հեռուստաընկերության շաբաթական վերլուծական հաղորդումը, որ նվիրված է եղել «Հայաստանի կողմից Ադրբեջանի հետ սահմանին ահաբեկչություն իրակաանցնելու հավանականությանը»: Ըստ գործակալության, անդրադարձ է եղել Ջերմուկի ուղղությամբ Ֆրանսիայի ժանդարմերիայի «բարձրաստիճան ներկայացուցչի կողմից ադրբեջանական դիրքերի դիտարկմանը»:
Ադրբեջանական մամուլը սրված ուշադրություն է դարձնում «հայ-ադրբեջանական սահմանին Չեխիայի քաղաքացու ձերբակալմանը»: Ընդսմին, առայսօր չի բացահայտվում այդ անձի ինքնությունը, ինչպես նաեւ՝ տեղանքը, որտեղ նա «Հայաստնից փորձել է անցնել Ադրբեջան»: Բաքվում Չեխիայի դեսպանատունը հաստատել է իր քաղաքացու ձերբակալությունը: Չափազանց ուշագրավ է, որ այդ միջադեպը տեղի է ունեցել Չեխիայի Պատգամավորների պալատի նախագահի Երեւան եւ Բաքու այցից հետո: Ադրբեջանի ԱԳՆ-ն խոսնակի մակարդակով քննադատել է նրան՝ «հակաադրբեջանական հայտարարությունների համար»:
Հայաստանում Եվրամիության դիտորդական առաքելությունը հավասարապես անընդունելի է Մոսկվայի եւ Բաքվի համար: Շաբաթասկզբին Եվրամիությունը Թուրքիային երկխոսություն սկսելու առաջարկ էր արել, բայց Անկարան հայտարարեց, որ ԵՄ-ին անդամակցության սպասելու ժամանակ չունի, պետք է «այլընտրանք եւ պատմական ճանապարհ ունենա»: Էրդողան-Պուտին բանակցություններում, չի բացառված, տարածաշրջանում ԵՄ դիտորդական առաքելության թեման եւս քննարկվելու է:
Ադրբեջանի հատուկ նշանակության ստորաբաժանումների զորավարժությունների «պայմանական առաջադրանքը» հուշում է, որ խնդիրը Հայաստանի սահմանին եւ սահմանամերձ տարածքներում հատուկ գործողության նախապատրաստությունն է: Պետական քարոզչությունը տեղեկատվական «հիմնավորում» արդեն ստեղծել է՝ սլաքներն ուղղելով Ֆրանսիայի դեմ:
