Վրաստանի սահմանային հսկողության միջոցառումներն ուժեղացվել են, և ներդրվում են այցելուներին վերահսկելու նոր տեխնոլոգիաներ: Ինչպես տեղեկանում է Sputnik գործակալության վրացական ծառայությունից, այդ մասին հայտնում է ներքին գործերի նախարարի պաշտոնի թեկնածու Վախթանգ Գոմելաուրին։
Վրաստանի ներքին գործերի նախարարության տվյալներով՝ 2023 թ. հունվարի 1-ից մինչև դեկտեմբերի 31-ն ընկած ժամանակաշրջանում Վրաստան է մուտք գործել 7 մլն 157 հազար 742 օտարերկրացի։ Դրա հետ մեկտեղ տարանցիկ մուտքերը տարվա ընթացքում կազմել են 1,3 մլն, իսկ 24 ժամից պակաս ժամանակահատվածով մուտքերը՝ 1,6 մլն։
«Սահմանն առավելագույնս հսկվում է: Պետական անվտանգության ծառայության հետ միասին մենք ստուգում ենք բոլորին: Խոսքը սահմանային հսկողության մասին է, դեմքերի ճանաչման համակարգի մոնտաժի մասին: Ներդրվել է նոր ծրագիր և ստուգվում է», – ասել է Գոմելաուրին:
Նրա խոսքով՝ նախորդ տարիների համեմատությամբ սահմանին հսկողությունը խստացվել է։
2023 թվականին մուտքերի ու ելքերի թվով առաջատարը ՌԴ քաղաքացիներն են, երկրորդ տեղում` Թուրքիայի քաղաքացիները, իսկ երրորդում՝ Հայաստանի քաղաքացիները։
