Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին Գորիում մասնակցել է Վրաստանի պաշտպանության նախարարության ակադեմիայի բացմանը։ Իր ելույթում Սաակաշվիլին նշել է.
«Շատերն այսօր հարցնում են, թե վրացի զինծառայողներն ի՞նչ գործ ունեն Աֆղանստանում, և ասում են, որ Սաակաշվիլին փորձում է մեր զինծառայողների հաշվին միավորներ գրանցել իր ակտիվում և պահպանել իր աթոռը։ Սակայն ինձ համար իմ աթոռն ու իմ կյանքն ընդհանրապես ոչինչ չարժեն, երբ խոսք է գնում Վրաստանի պետական շահերի մասին։
Վրացի զիծառայողները գտնվում են Աֆղանստանում նրա համար, որ դա ուժեղացնում է Վրաստանի զինված ուժերը։ Այնտեղ նրանք անգնահատելի փորձ են ձեռք բերում աշխարհի լավագույն բանակների հետ փոխհարաբերություններից։ Ես գեներալ Պետրեուսից լսել եմ, որ, բացի ամերիկացիներից, վրացական զինվորական կոնտինգենտը լավագույնն է եղել նրանց թվում, որոնց հետ նա ստիպված է եղել աշխատել։
Շատ ժամանակ, երբ վրացի խաղաղապահ է զոհվում, մարդիկ ասում են, թե դա չպետք է տեղի ունենար Աֆղանստանում։ Սակայն եկեք խորը մտածենք. վրացական պետությունն ունի՞ մարտահրավերներ, արդյոք նրան անհրաժե՞շտ է բանակ։ Իհարկե անհրաժեշտ է։ Նա պե՞տք է փորձառու լինի։ Իհարկե պետք է։ Մեզ անհրաժե՞շտ է ուժեղ դաշնակիցների օգնությունը։ Բնականաբար անհրաժեշտ է։
Այսօր այդ ամենը ձեռք է բերվում աֆղանական ճակատում։ Ցանկանո՞ւմ ենք պետություն ունենալ։ Եթե այո, ապա պետք է ունենալ բանակ։ Ցանկանո՞ւմ ենք բանակ ունենալ։ Եթե այո, ապա մենք պետք է լինենք Աֆղանստանում։ Այդ ամենը մենք չենք անում ինչ-որ մեկի գեղեցիկ աչքերի և առավել ևս ինչ-որ միավորների համար։ Համոզված եմ, որ ժամանակի ընթացքում շատերը կաջակցեն մեզ, քանի որ վճռական պահին այդ մեծ դպրոցն անցած զինծառայողները օգտակար կլինեն Վրաստանին»։
Հիշեցնենք, որ Վրաստանն Աֆղանստանում գործող Միջազգային անվտանգության աջակցության ուժերի (ISAF) գործողություններում ներգրավվել է 2009 թվականից։ Ներկայումս այնտեղ են գտնվում 900-950 վրացի խաղաղապահներ։ Վերջիններիս դասակը (175 զինվոր ու սպա) տեղակայված է Քաբուլ քաղաքում՝ Ֆրանսիայի պատասխանատվության գոտում, իսկ գումարտակը (749 մարդ)՝ Հիլմենդ նահանգում՝ ԱՄՆ պատասխանատվության գոտում։
2012 թվականին Աֆղանստանում գտնվող վրացի զինծառայողների թվաքանակը հասնելու է 1500-ի, որով և Վրաստանը պետք է դառնա ՆԱՏՕ-ի անդամ չհանդիսացող երկրներից Աֆղանստանում ամենամեծ զինվորական կոնտինգենտն ունեցող երկիրը։ Սեպտեմբերի սկզբին Աֆղանստանում զոհվեց 10-րդ վրացի զինծառայողը։
