Բազմաթիվ են կրթական տարաբնույթ ծրագրերը Հայաստանում, սակայն մարզերում այդ բացն ակնհայտ է: Այն լրացնելու նպատակով Հայաստանի ԱՄՆ շրջանավարտների ասոցիացիան և ՀՀ-ում ԱՄՆ դեսպանատունը որոշեցին կազմակերպել համատեղ ծրագիր: Այս մասին «Առաջին լրատվականի» հետ զրույցում տեղեկացրեց Հայաստանի ԱՄՆ շրջանավարտների ասոցիացիայի գործադիր տնօրեն Խաչիկ Գևորգյանը:
Նրա խոսքով`«Համալսարանական կյանքն ԱՄՆ-ում» թեմայով դասախոսությունների հիմնական նպատակն այն է, որ ԱՄՆ Պետքարտուղարության ֆինանսավորմամբ տարբեր ծրագրերի շրջանավարտները և ԱՄՆ դիվանագետները յուրաքանչյուր ամիս մեկ կամ երկու անգամ այցելեն մարզեր ու դասախոսություններ կարդան կրթական ու գիտական ծրագրերի հնարավորությունների մասին` սկսած դպրոցական տարիքից մինչև ուսուցիչներ ու պրոֆեսիոնալ մակարդակի հասած գործիչներ:
Ծրագիրը կտևի մինչև մայիս, առաջին դասախոսությունը տեղի կունենա Եղեգնաձորում, իսկ հունիսին կկազմակերպվի կրթական տոնավաճառ, որտեղ կներկայացվեն Պետքարտուղարության կողմից ֆինանսավորվող բոլոր ծրագրերը ու ամերիկյան տարբեր բուհերը:
