Հայաստանի և Արգենտինայի միջև վիզային ռեժիմի վերացումը կնպաստի արտագաղթի ավելացմանը: Նման կարծիք «Առաջին լրատվական»-ի հետ զրույցում հայտնեց Հայաստանի տուրիզմի ընկերակցության նախագահ Արթուր Ոսկանյանը:
Ըստ նրա՝ զբոսաշրջության տեսակետից հնարավոր է, որ Արգենտինայից դեպի մեր երկիր այցելությունները որոշ չափով ակտիվանան, սակայն էական փոփոխություն չի լինի. «Եթե խոսքը ներգնա տուրիզմի մասին է՝ որ արգենտինացիները կգան ՀՀ, ապա էական փոփոխություն սպասել պետք չէ: Հայաստանից Արգենտինա զուտ տուրիստների մեկնելու առումով, որ նպատակ ունեն գնալու, նրանց համար վիզան խնդիր չի եղել: Ուղղակի զբոսաշրջության քողի տակ կարող է արտագաղթն ավելանալ, առավել ևս, որ Արգենտինայում հին սփյուռքի հսկայական մեծ համայնք կա»:
Հիշեցնենք, որ Հայաստանի ԱԳ նախարար Էդվարդ Նալբանդյանը և Արգենտինայի արտգործնախարարի տեղակալ Ալբերտո դե Ալոտոն երեկ Երևանում ստորագրել են մուտքի արտոնագրի պահանջի վերացման մասին միջպետական համաձայնագիրը:
