Ուկրաինայի իշխանությունները հայտնել են, որ վաղ առավոտյան ռուսական ուժերը զանգվածային հրթիռակոծության են ենթարկել երկրի տարածքը, որի հետևանքով տարբեր քաղաքներում կան զոհեր և վիրավորներ։ Այս մասին տեղեկանում է BBC-ի ռուսական ծառայությունից։
Ուկրաինայի ամբողջ տարածքում հունվարի 23-ի առավոտյան օդային տագնապի ազդանշաններ են հնչել։ Գնդակոծության են ենթարկվել Կիևը, Խարկովը և Պավլոգրադը։
Խարկովում զոհվել է 4 մարդ, 11 մարդ՝ վիրավորվել։ Փլուզվել է բազմաբնակարան շենքի մուտքերից մեկը։ Հաղորդվում է, որ քաղաքը գնդակոծվել է ինչպես գիշերը, այնպես էլ առավոտյան։
Կիևում 18 մարդ է վիրավորվել, հրդեհվել է բազմաբնակարան շենքի մեկ բնակարան, վնասվել են պատշգամբներ, այրվել մեքենաներ։ Իսկ Պավլոգրադում հրթիռակոծության հետևանքով 1 մարդ զոհվել։
Ուկրաինայի զինված ուժերը հայտնել են, որ հակաօդային պաշտպանության համակարգերը ոչնչացրել են Ռուսաստանի կողմից արձակված հրթիռների կեսը։ Ըստ Ուկրաինայի ռազմաօդային ուժերի՝ երկրի տարածքի վրա է արձակվել թևավոր, բալիստիկ, ավիացիոն և զենիթային կառավարվող 41 հրթիռ։
Ռուսաստանն այս հարվածների մասին տեղեկություններն առայժմ չի մեկնաբանել։
