Սեպտեմբերի 26-ին Ազգային ժողովում կքննարկվեն ԱՊՊԱ-ի 8-ամսյա գործունեության արդյունքները, համակարգում առկա խնդիրները, այդ թվում՝ նաև ապահովագրավճարների կատարման մակարդակը, հատուցումների մակարդակը, շահութաբերությունը և սակագներն իջեցնելու հնարավորությունը:
ԱԺ Ֆինանսավարկային և բյուջետային հարցերով խորհրդարանական հանձնաժողովի փոխնախագահ Արծվիկ Մինասյանն «Առաջին լրատվական»-ին հայտնեց, որ իրենք հաշվարկներ են կատարում՝ որոշելու, թե ԱՊՊԱ-ի սակագները որքա՞ն հնարավոր կլինի իջեցնել:
«Դժվար է ասել, թե ինչքան հնարավոր կլինի սակագներն իջեցնել, բայց որոշակի էական իջեցում մենք տեսնում ենք»,- ասաց Ա. Մինասյանը:
Նշենք, որ 2011 թ. օգոստոսի 31-ի դրությամբ, ԱՊՊԱ պայմանագրերով հաշվեգրվել է 13 մլրդ 168 մլն 894 հազ. դրամ, բավարարվել և վճարվել է 2 մլրդ 765 մլն 819 հազ. դրամ, բավարարվել, սակայն դեռևս չի վճարվել 72 մլն 739 հազ. դրամ: Հայաստանի ավտոապահովագրողների բյուրոյի հրապարակած վիճակագրական հաշվետվության համաձայն, պայմանագրերի ընդհատման արդյունքում վերադարձվել կամ ենթակա է վերադարձման 224 մլն 821 հազ. դրամ:
ԱՊՊԱ պայմանագիր առկա է գործող 373,022 տրանսպորտային միջոցի հանդեպ, հատուցում ստանալու համար ներկայացվել է 15,013 դիմում, որից մերժվել է 89-ը:
