ՄԱԿ-ի գլխավոր քարտուղար Անտոնիո Գուտերեշը կարծում է, որ որքան երկար շարունակվի հակամարտությունը Գազայի հատվածում, այնքան մեծ է իրադրության էսկալացիայի հավանականությունը։ Այդ մասին նա գրել է X սոցիալական հարթակի իր էջում։
«Որքան երկար է շարունակվում հակամարտությունը Գազայում, այնքան մեծ է էսկալացիայի և սխալ հաշվարկների վտանգը: Մենք չենք կարող Լիբանանում տեսնել այն, ինչ տեսնում ենք Գազայում: Եվ մենք չենք կարող թույլ տալ, որ այն, ինչ կատարվում է Գազայում, շարունակվի», – գրել է ՄԱԿ-ի գլխավոր քարտուղարը:
Մերձավոր Արևելքում իրադրությունը կտրուկ սրվել է 2023 թ․ հոկտեմբերի 7-ին Գազայի հատվածից Իսրայելի տարածք ՀԱՄԱՍ-ի զինյալների ներթափանցումից հետո, որի հետևանքով Իսրայելում 1200 մարդ էր զոհվել, շուրջ 240 մարդ՝ գերեվարվել։ Պատանդներից 105-ը 7-օրյա հումանիտար հրադադարի ժամանակ փոխանակվել են Իսրայելում բանտարկված շուրջ 240 պաղեստինցիների հետ։
Ի պատասխան՝ Իսրայելը հայտարարել է Գազայի հատվածի ամբողջական շրջափակման մասին, իսկ ավելի ուշ ցամաքային գործողություն է սկսել անկլավում։ Գազայի հատվածում իսրայելական հարվածների հետևանքով զոհերի թիվը գերազանցել է 24 000-ը, վիրավորների թիվը 61 000 է։
