«Ձգձգելն ավելորդ է, և պետք է իսկապես այս քայլը կատարել»,- ասաց Արտյուշա Շահբազյանը` պատասխանելով լրագրողի այն դիտարկմանը, թե հայ-թուրքական արձանագրությունները հետ վերցնելու վերաբերյալ Հովիկ Աբրահամյանն ասել է, որ պետք է մի քիչ էլ սպասենք:
Մեկնաբանելով «Օքսֆորդ անալիտիկ»-ի այն վերլուծությունը, թե աղետալի պատերազմ է կանխատեսվում, որն ավելի վտանգավոր է լինելու, բանախոսն ասաց, թե առաջին տարին չէ, որ այդ վտանգի մասին խոսվում է:
«Կարող եմ համաձայնել, որ նոր պատերազմը կլինի նախորդից շատ ավելի ահավոր, քանի որ երկու կողմում էլ մեծ զինուժ է կուտակված: Մի հանգամանք կա, որի պատճառով, կարծում եմ, Ադրբեջանը չի դիմի ծայրահեղ քայլերի. դա հայկական կողմի ոգին և այն դասն է, որ մենք նրանց տվել ենք: Սա մոտ հեռանկարում նրանց զսպելու է»:
Անդրադառնալով WikiLeaks-ի հրապարակումներին` Ա. Շահբազյանը նկատեց, որ բոլորս պետք է կարդանք և անենք համպատասխան վերլուծություններ. ինչպես են Հայաստանում մեծ-մեծ գաղափարներից խոսող անձինք տարբեր ժամանակներում վազել տարբեր դեսպանատներ՝ հարցնելու՝ ի՞նչ անել, ի՞նչ չասել, սրանք էլ, իրենց հերթին, խորհուրդներ են տվել: Միաժամանակ` նա չի կարծում, թե WikiLeaks-ը կարող է կատալիզատորի դեր տանել:
Մամուլում եղած այն տեղեկությունը, թե Դաշնակցության ամերիկյան կառույցը փոշմանել է և մասնակցելու է ճաշկերույթին, ՀՅԴ պատգամավորնասաց, որ չի կարդացել, բայց կարող է ասել, որ իրենց միջև խնդիրներ չկան:
Ինչ վերաբերում է նախընտրական շրջանին՝Ա. Շահբազյանն ասաց, որ իրենք հավասարակշռված են և հիստերիկ բաներ չեն անում: Նա կարծում է, որ գերադասելի է նախընտրական շրջանն ուշ սկսել, լավ տեղ հասնել, քան շուտ սկսել և ճանապարհի կեսից սպառվել:
Այն դիտարկմանը, թե գյումրեցիների հետ հանդիպումը մարդաշատ չէր, դաշնակցական պատգամավորն արձագանքեց, որ մեծ խնդիր են տեսնում ժողովրդին, քաղաքական կազմակերպություններին բացատրելու, թե ինչ են իրենք ցանկանում: Իրենց համար կարևոր են առաջիկա հանդիպումները` թե՛ գյուղերում, թե՛ կոլեկտիվներում: ՀՅԴ-ի խնդիրն իրենց ասելիքը ժողովրդին հասցնելն է:
