Անցած տարի հանրապետությունում շուրջ 314 հեկտար անտառպատման աշխատանքներ են իրականացվել։
Այս մասին հունվարի 15-ի ասուլիսին ասաց ՀՀ շրջակա միջավայրի նախարար Հակոբ Սիմիդյանն՝ անդրադառնալով 2023 թվականի գործունեության արդյունքների ամփոփմանն ու ոլորտի բարեփոխումներին։
«Դրանից 130 հեկտարն իրականացվել է պետական բյուջեի միջոցներով, իսկ մնացածը՝ վնասի փոխհատուցման գումարներով։ Իհարկե, 2024 թվականից անտառպատման, անտառների ստեղծման աշխատանքները շատ մեծ թափով առաջ կգնան։Մենք նպատակադրված են 1000 հեկտար անտառ հիմնել»,-ասաց նախարարը։
Նրա խոսքով՝ անցած տարի անտառներում վնասատուների դեմ առաջին անգամ կենսաբանական պայքարի միջոցներ են կիրառվել։
Սիմիդյանի գնահատմամբ՝ մինչև 2022-ը վնասատուների դեմ պայքարի քիմիական միջոցների արդյունավետությունը շատ ցածր է եղել։ Բացի այդ, ինչպես մասնագետներն են նշել այդ միջոցները նաև իրենց վնասակարության աստիճանն ունեն։
«Առաջին անգամ 4100 հեկտար տարածքներում իրականացրել ենք կենսաբանական պայքար և հիմա նաև գնահատում ենք դրա արդյունքները։ Մեր համոզմամբ՝ արդեն որոշակի վերլուծություններով տեսնում ենք, որ որոշ տեղերում վնասատուներն ընդհանրապես վերանում են»,-մանրամասնեց նախարարը։
Ըստ գերատեսչության ղեկավարի՝ 2023 թվականին հաստատվել են 7 անտառտնտեսությունների կառավարման պլանները, իսկ այս տարի կհաստատվի ևս 4-ը, որից հետո կառավարման պլաններ կունենան բոլոր 17 անտառտնտեսությունները։
