Մինչ օրս Հայաստանից արտահանվել է 10 հազ. 24 տոննա պտուղ-բանջարեղեն, նախորդ տարվա նույն ժամանակաշրջանում արտահանվել էր 7 հազ. 800 տոննա: ՀՀ գյուղատնտեսության փոխնախարար Ռոբերտ Մակարյանն «Առաջին լրատվական»-ին տեղեկացրեց, որ այս տարի սեպտեմբերի 15-ի դրությամբ արտահանվել է 7.3 հազ. տոննա ծիրան՝ 2010-ի նույն ժամանակաշրջանի 1.9 հազ. տոննայի փոխարեն, 674 տոննա կեռաս`2010-ի 282 տոննայի փոխարեն, 165 տոննա դեղձ՝ 2010-ի 150 տոննայի փոխարեն, 256 տոննա սալոր`2010-ի 154 տոննայի փոխարեն: Այս տարի արտահանվել է նաև տանձ, խնձոր, բալ, որոնք նախորդ տարի այս ժամանակաշրջանի դրությամբ չեն արտահանվել:
Արտահանվել է նաև 35 տոննա լոլիկ, 91 տոննա վարունգ, 102 տոննա պղպեղ, որոնք նույնպես նախորդ տարի այս ժամանակահատվածում չեն արտահանվել: Սպասվում է, որ մեծ քանակությամբ կարտոֆիլ կարտահանվի:
Փոխնախարարը նշեց, որ երեկ և այսօր ընթանում է խաղողի մասսայական մթերումը: Արդեն արտահանվել է 684 տոննա խաղող, և, բերքի ծավալներն ավելանալուն զուգընթաց, այդ թիվը կմեծանա: Անցած տարի այսօրվա դրությամբ արտահանվել էր 1500 տոննա խաղող:
Ռ. Մակարյանը տեղեկացրեց, որ Հայաստանը պտուղ-բանջարեղեն է արտահանել հիմնականում ՌԴ, Վրաստան, Ուկրաինա և փոքր քանակներով Նիդեռլանդներ (1 տոննա ծիրան), ԱՄԷ (1 տոննա կանաչեղեն):
«Նախորդ տարվա համեմատ, այս տարի ավելի շատ է արտահանվել, քանի որ գյուղմթերքների արտադրությունն է ավելացել, նաև արտահանման ծավալներն են աճել: Հույս ունենք, որ մյուս տարի ավելի շատ կարտահանենք, քանի որ արտահանման գները բարձր են եղել»,- ասաց փոխնախարարը` հավելելով, որ պտուղ-բանջարեղենի 94%-ն արտահանվում է տրանսպորտով, 6%-ն՝ ինքնաթիռով:
