Բրազիլիայի մեգապոլիսներից մեկի` Սան Պաուլոյի մերձակայքում տեղի է ունեցել խոշոր ավտովթար, որի ժամանակ միմյանց են բախվել միանգամից 300 մեքենա: Այս մասին հաղորդում են բրազիլական լրատվամիջոցները` նշելով, որ վթարի հիմնական պատճառը վատ եղանակային պայմաններն են:
Վթարը ծագել է, երբ բեռնատարի վարորդը, որը քիմիկատներ է տեղափոխել, կորցրել է վերահսկողությունը մեքենայի նկատմամբ և դուրս եկել հանդիպակաց ճանապարհ: Այնտեղ նա բախվել է մի քանի ուղևորատար մեքենաների: Արագընթաց ճանապարհին մեքենաներն ուղղակի չեն հասցրել տեսնել վթարը և մեկը մյուսի հետևից բախվել են դիմացից ընթացող մեքենաներին: Տեղի ոստիկանության տարածած հաղորդագրության մեջ նշվում է, որ լուրջ վնասվածքներ է ստացել 220 մեքենա, 80-ը քիչ են վնասվել: Մահացել է բեռնատարի վարորդը, կա 50 վիրավոր, որոնցից 2-ը գտնվում են ծանր վիճակում:
Բրազիլական լրատվամիջոցների փոխանցմամբ, այս վթարը պատճառած վնասով նման է 1977 թ. վթարին, երբ միմյանց էին բախվել 151 մեքենա, մահացել էր 15 մարդ, 285-ը ստացել էին մարմնական վնասվածքներ:
