Ռուսական Regnum լրատվական գործակալության փոխանցմամբ՝ Կովկասի հարցերով վրացի փորձագետ Մամուկա Արեշիձեն վրացական «Ալիա» թերթին տված հարցազրույցի ժամանակ հայտարարել է, թե օտարազգի բարձրաստիճան հյուրերը Վրաստան են հաճախում հատուկ պահերին, և առաջիկա հոկտեմբեր-նոյեմբերին Ֆրանսիայի նախագահ Նիկոլա Սարկոզիի և ՆԱՏՕ-ի գլխավոր քարտուղար Անդերս Ֆոգ Ռասմուսենի վրացական այցերը կարող են կապված լինել այդպիսի պահերից մեկի հետ.
«Մենք չգիտենք, թե կոնկրետ ինչ նպատակով է Վրաստան ժամանում Սարկոզին, սակայն ելնելով փորձից՝ գիտենք, որ նա սովորաբար գալիս է նշանակալից պահերին, և, ինչպես երևում է, ներկայումս նույնպես նա մեր կառավարության հետ խոսելու է հատուկ կարևորություն ներկայացնող հարցերի շուրջ, իսկ Ռասմուսենի նպատակը լինելու է այդ զրույցի շարունակությունը։
Ես վստահ եմ, որ աշխարհում տեղի ունեցող աշխարհաքաղաքական փոփոխությունների ֆոնին համանման փոփոխություններ սկսվում են նաև Հարավային Կովկասում։ Ենթադրում եմ, որ այդ այցերի ընթացքում խոսք է գնալու Ղարաբաղի, Աբխազիայի և Հարավային Օսիայի հակամարտությունների, էներգետիկ նախագծերի, նավթամուղների և հաղորդակցության ուղիների մասին։
Բացի այդ, Արևմուտքը շահագրգռված է Հարավային Կովկասում Ռուսաստանի ազդեցության թուլացմամբ, և սեփական շահերի ամրապնդմամբ։ Իսկ դրա համար նրան անհրաժեշտ է թիկունք, և այդպիսի «թիկունքներից» մեկը կարող է լինել Թբիլիսին։
Արևմուտքը մեկ անգամ չէ, որ իր դժգոհությունն է հայտնել Վրաստանում ժողովրդավարության շուրջ տիրող վիճակից, սակայն մեր կառավարությունը դա թողել է անարձագանք։ Մեր կառավարության անկանխատեսելի ներքին քաղաքականությունը սպառնում է Արևմուտքի շահերին։ Նրանք տեղյակ են իշխանական տարբեր շերտերի միջև առկա հակամարտությանը, և որպեսզի դա չվերածվի քաղաքացիական դիմակայության, ու երկրում դժբախտություն տեղի չունենա, բացառված չէ, որ այդ թեման դառնա Սարկոզիի այցի քննարկման առարկաներից մեկը»։
Հիշեցնենք, որ 3 օր առաջ էլ Վրաստանի խորհրդարանի խոսնակ Դավիթ Բաքրաձեն Рустави-2 հեռուստաընկերության եթերում հայտարարել էր, որ ՆԱՏՕ-ի գլխավոր քարտուղար Անդերս Ֆոգ Ռասմուսենի և Ֆրանսիայի նախագահ Նիկոլա Սարկոզիի առաջիկա վրացական այցերը խոսում են այն մասին, որ Վրաստանը գտնվում է միջազգային քաղաքականության ուշադրության կենտրոնում. «Այդ կարգի այցերը նշանակում են, որ Վրաստանը մնում է միջազգային քաղաքականության ուշադրության կենտրոնում, և որ Վրաստանը շարունակում է մնալ մեծ քաղաքականության կենտրոն։ Այդպիսի այցերը կարևորություն են ներկայացնում ոչ միայն արտաքին քաղաքականության, այլև՝ երկրի զարգացման տեսանկյունից»։