ԱՄՆ պետքարտուղար Էնթոնի Բլինքենը Ստամբուլում ավարտել է բանակցությունները Թուրքիայի արտգործնախարար Հաքան Ֆիդանի եւ նախագահ Ռեջեփ Թայիփ Էրդողանի հետ: Այդ առթիվ տեղեկատվությունը սուղ է: Այս պահի դրությամբ արտահոսք թույլ է տվել «Միլլիեթը»՝ ներկայացնելով միայն թուրքական կողմի տեսակետները, ինչից կարելի է ենթադրել, որ բանակցությունները բարդ են եղել: Խոսքը, մասնավորապես, այն մասին է, որ Թուրքիան Գազայի հատվածում կրակի անհապաղ դադարեցման, մարդասիրական օգնության մեծացման եւ «երկու պետություն սկզբունքով քաղաքական կարգավորման կողմնակից է»:
Ըստ «Միլլիեթի»՝ Բլինքենը եւ Ֆիդանը քննարկել են նաեւ F-16 կործանիչների վաճառքի, Սեւ ծովում Ռուսաստանից եւ Ուկրաինայից պարենային մթերքների արտահանման, Հայաստանի եւ Ադրբեջանի միջեւ բանակցությունների, Իրաքում եւ Սիրիայում իրավիճակի հետ կապված հարցեր: Ինչ վերաբերում է ՆԱՏՕ-ին Շվեդիայի անդամակցությանը, ապա Ֆիդանն ասել է, որ արձանագրության վավերացումը «խորհրդարանի իրավասության հարց է»: Էրդողան-Բլինքեն հանդիպման մասին պաշտոնական կամ անուղղակի տեղեկություն դեռեւս հայտնի չէ:
Թուրքիայի նախագահի գրասենյակը միայն լուսանկար է հրապարակել, ինչից երեւում է, որ արտգործնախարար Ֆիդանից բացի թուրքական կողմից ներգրավվել է նաեւ Ազգային հետախուզության ծառայության տնօրեն Իբրահիմ Քալընը: Վերջին օրերին Թուրքիայում տասնյակ անձինք ձերբակալվել են Իսրայելի օգտին լրտեսության կասկածանքով: Նրանցից ութի նկատմամբ ընդունվել է արտաքսման որոշում: Արտաքսման ենթակա անձանց մեջ կա՞ն Միացյալ Նահանգների կամ նրա մերձավոր դաշնակից երկրի, երկրների քաղաքացիներ՝ հայտնի չէ, բայց նաեւ չի կարելի բացառել, որ Քալընը պետքարտուղար Բլինքենին ինչ-որ գերկարեւոր տեղեկություններ փոխանցելու համար է մասնակցել նրա եւ նախագահ Էրդողանի հանդիպմանը::
Բլինքեն-Ֆիդան բանակցություններին ընդառաջ Իսրայելի հյուսիսային շրջանները ենթարկվել են հրթիռակոծության: Ավելի քան իննսուն բնակավայրերում օդային տագնապ է հայտարարվել, քաղաքացիական բնակչությունը տարհանվել է: Միջազգային լրահոսում տեղ է գտել հեղինակավոր «Ջերուզալեմ փոստ» պարբերականի գնահատականը, որ «եթե ճգնաժամը չհաղթահարվի, Իսրայելի հյուսիսային սահմանը կսկսվի Հայֆայից»: Հայֆան Լիբանանի սահմանից ուղիղ գծով 40 կիլոմետր խորության վրա է գտնվում:
Իսրայելի հյուսիսային շրջանների հրթիռակոծումը «Հեզբոլլա»-ն հայտարարել է «վրեժխնդրության առաջին քայլ»՝ ի պատասխան Բերյրութի Դահիա արվարձանում ՀԱՄԱՍ-ի երկրորդ դեմքի՝ Սալեհ ալ-Արուրիի սպանության, որ իրականացրել է Իսրայելը ԱԹՍ-ի կամ ինքնաթիռից արձակված հրթիռի միջոցով: Բայց ինչու՞ «վրեժխնդրության քայլն» արվել է Ստամբուլում Բլինքեն-Ֆիդան բանակցությունների մեկնարկին գրեթե զուգահեռ եւ այն ժամերին, երբ Եվրամիության անվտանգության եւ արտաքոին գործերի հանձնակատար Բորելը բանակցություններ էր վարում Լիբանանի վարչապետ Մաքաթիի հետ:
Արեւմտյան փորձագիտական շրջանակներում տեղեկություն է շրջանառվել, որ Իսրայելը համաձայն է «ՀԱՄԱՍ-ի ոչնչացումից հետո Գազայի հատվածը հանձնել Պաղեստինի ինքնավար վարչակազմի կառավարմանը, բայց պայմանով, որ իր հատուկ ծառայություններն այնտեղ ունենան ազատ ելումուտի իրավունք»: Թուրքիան բազմիցս պնդել է, որ ՀԱՄԱՍ-ը ոչ թե ահաբեկչական, այլ քաղաքական կազմակերպություն է եւ պետք է անկախ Պաղեստինի քաղաքական համակարգի մաս կազմի:
Բլինքենի մերձավորարեւլյան շրջայցի աշխարհագրությունն ընդգրկում է նաեւ Հորդանան գետի Արեւմտյան ափը, որտեղ Պաղեստինի ինքնավարության նստավայրն է: Անցած տարեվերջին ինքնավարության առաջնորդ Մահմուդ Աբասը հրաժարվել էր Բլինքենի հետ հանդիպումից, բայց այն ժամանակ նա պատրաստվում էր մեկնել Մոսկվա: Այդ այցը տեղի չունեցավ: Ռուսաստանը երբեք պաշտոնապես չի հայտարարել, որ իսրայելա-պաղեստինյան հակամարտությունը պետք է կարգավորվի « երկու պետություն» սկզբունքով:
Իսրայելի հյուսիսի հրթիռակոծմամբ «Հեզբոլլա»-ն ու՞մ է սպառնում Մերձավոր Արեւելքը ,,պայթեցնելու,, հեռանկարով: Իսրայելի՞ն, Միացյալ Նահանգների՞ն, Պաղեստինի ինքնավարության առաջնորդի՞ն, որի հետ կապերը չի խզել Իսրայելի անգամ պատերազմական կառավարությունը: Իսրայելի դեմ հյուսիսային ճակատ բացելու սպառնալիքը «Հեզբոլլա»-ի ինքնագործունեությու՞նն է: Բլինքենին, ըստ երեւույթին, չի հաջողվի ճեղքել Պաղեստինի հարցում արաբա-իսլամական ֆորմալ համաձայնությունը: Բլինքենի մերձավորարեւելյան շրջայցին ընդառաջ բրիտանական The Telegraph-ը մռայլ կանխատեսում է արել, որ «ԱՄՆ կայսրությունը փլուզվում է, եւ բոլորը ձգտում են պոկել իրենց բաժինը»:
