Եթե մարդը սովոր է աշխատանքային օրերին շուտ արթնանալ, ապա հանգստյան օրերին երկար քնելը կարող է տրամադրության անկման և դեպրեսիայի ռիսկի բարձրացման հանգեցնել, ասվում է նոր ուսումնասիրության մեջ:
Միչիգանի համալսարանի ակադեմիական բժշկական կենտրոնի մասնագետները տարվա ընթացքում իրենց կարիերան սկսած 21,000 բժշկի քնի և տրամադրության վերաբերյալ տվյալներ են հավաքել:
Նրանք պարզել են, որ անկանոն քունը կարող է մեծացնել դեպրեսիայի ռիսկը նույն կերպ, ինչպես, ընդհանուր առմամբ, ավելի քիչ ժամերի քունը: Նրանք պարզեցին, որ կիրակնօրյա երկարատև քունը երկուշաբթի առավոտյան կարող է ազդել մարդու տրամադրության վրա և նրան դյուրագրգիռ դարձնել, ասես նախորդ օրը շատ ուշ է քնել և չի հանգստացել։
Ուսումնասիրությանը մասնակցել են այն ինտերնները, որոնք բժշկական համալսարանից հետո ավարտել են օրդինատուրայի առաջին տարին՝ անցնելով երկար, սթրեսային աշխատանքային օրեր և անկանոն գրաֆիկ՝ առանց ռեժիմի:
Ուսումնական տարվա ընթացքում ստաժորներին բաժանել են դեպրեսիայի եռամսյակային թեստեր: Հետազոտության հեղինակները պարզել են, որ նրանք, ովքեր ունեն քնի փոփոխական գրաֆիկ, ավելի շատ բալ են հավաքել դեպրեսիայի հարցաթերթիկում: Այսինքն՝ նրանք հոգեկան խանգարման եզրին են։ Նրանց արդյունքները նման էին այն մարդկանց արդյունքին, որոնք սովորաբար քիչ են քնում:
Michigan Medicine-ի մասնագետները տարբեր տարիքային խմբերի համար խորհուրդ են տալիս քնի համար սահմանել հետևյալ տևողությունը.
Նախադպրոցական (3-5 տարեկան) ՝ 10-13 ժամ
Դպրոցական տարիք (6-13 տարեկան) ՝ 9-11 ժամ
Պատանիներ (14-17 տարեկան) ՝ 8-10 ժամ
Երիտասարդներ (18-25) 7-9 ժամ
Մեծահասակներ (26-64) ՝ 7-9 ժամ
Տարեցներ (65 տարեկան և բարձր) 7-8 ժամ
