Իսպանացի բռնապետ, գեներալ Ֆրանկոյի մասին հետաքրքիր մանրամասներ են պարզ դարձել այն բանից հետո, երբ բռնապետի թոռը որոշել է գիրք հրատարակել նրա մասին: Պարզվում է, որ գեներալը, ով ղեկավարել է Իսպանիան քաղաքացիական պատերազմից հետո` 1939 թվականից մինչև իր մահը` 1975 թվականը, զբաղվել է նկարչությամբ:
Ինչպես հայտնում է mignews.com-ը, բռնապետի թոռը, ում անունը նույնպես Ֆրանսիսկո Ֆրանկո է, ասել է, որ իր պապը ճաշից հետո միշտ առանձնանում էր և զբաղվում գեղանկարչությամբ: «Չնայած նրա աշխատանքները չեն կարող համարվել արվեստի գլուխգործոցներ, այնուամենայնիվ, դրանց որակը բավականին բարձր է»,- ասել է Ֆրանկոյի թոռը:
Գրքում բացի նկարներից, խոսվում է նաև այն մասին, թե բնավորության ինչպիսի գծեր է ունեցել Իսպանիայում ռազմական հեղաշրջում իրականացրած Ֆրանկոն: Գրքի վերնագիրն է` «Ֆրանկոյի բարությունը. երբ իմ պապը մարդ էր»: Այն հրատարակվել է այս տարվա սեպտեմբերին՝ Իսպանիայում: