Թուրքական Hürriyet թերթի փոխանցմամբ՝ Թուրքիան և ԱՄՆ-ն Անկարայում ստորագրել են հուշագիր թուրքական տարածքում ՆԱՏՕ-ի ռադիոտեղորոշիչ կայանի (ՌՏԿ) տեղակայման մասին։
Հուշագրում նշված է Թուրքիայի տարածքում ՌՏԿ-ի տեղակայման ստույգ վայրը։ Այն տեղակայվելու է երկրի արևելյան հատվածում ընկած Մալաթիայի նահանգի Քյուրեջիք վայրում։
Թուրքիայի կողմից հուշագիրը ստորագրել է արտգործնախարարության խորհրդական Ֆերիդուն Սինիրլիօղլուն, իսկ ԱՄՆ-ի կողմից՝ դեսպան Ֆրենսիս Ռիկիարդոնեն, որին ԱՄՆ Սենատի արտաքին հարաբերությունների հանձնաժողովը սեպտեմբերի 13-ի երեկոյան անցկացված նիստի ընթացքում հաստատել էր Թուրքիայում ԱՄՆ դեսպանի պաշտոնում։
Այլ մանրամասներ չեն հաղորդվում։
Հիշեցնենք, որ ավելի վաղ թուրքական կողմը ՌՏԿ-ի տեղակայման համար դիտարկում էր 4 տարբերակ՝ Մալաթիա, Ադանա, Դիարբեքիր և Իսքենդերուն, որոնցից ամենահավանականը համարվում էր Դիարբեքիրի տարբերակը։ Սակայն, ի վերջո, որոշվեց այն տեղակայել Մալաթիայում, քանի որ այդ դեպքում նրա տեսադաշտում է հայտնվում Միջերկրական ծովի ողջ ջրատարածությունը։
