Ադրբեջանական Trend լրատվական գործակալության փոխանցմամբ՝ Կահիրեում Թուրքիայի վարչապետ Էրդողանի հետ ունեցած հանդիպումից հետո նրա եգիպտացի գործընկեր Իսամ Շարաֆը հայտարարել է, որ Թուրքիան ավելի քան 3 անգամ ավելացնելու է Եգիպտոսի տնտեսության մեջ իր ներդրումների ծավալը՝ 1.5 միլիարդ դոլարից հասցնելով մինչև 5 միլիարդ դոլարի։
Երկու երկրների միջև ապրանքաշրջանառությունը 3 միլիարդ դոլարից հասցվելու է 5 միլիարդ դոլարի։ Այդ նպատակին է ծառայելու Էրդողանի եգիպտական այցի ժամանակ Կահիրեում ստորագրված տնտեսական և առևտրային համաձայնագրերի ու արձանագրությունների ամբողջական փաթեթը։
Այսօր Կահիրեում տեղի է ունենալու թուրք-եգիպտական գործարար խորհրդի նիստը, որին, նախարարներից բացի, մասնակցելու են նաև բազմաթիվ եգիպտացի և թուրք գործարարներ։ Թուրքական բիզնեսը չի թաքցնում, որ հետաքրքրված է զբոսաշրջության, հաղորդակցության ուղիների, բանկային հատվածի և էներգետիկայի ոլորտներում համագործակցությամբ։
Հիշեցնենք, որ Եգիպտոսի նախկին նախագահ Հոսնի Մուբարաքը անբարյացակամ էր տրամադրված Թուրքիայի հանդեպ՝ վերջինիս դիտարկելով որպես մրցակից իսլամական աշխարհում։
