Ադրբեջանի նախագահ Իլհամ Ալիևը հայտարարել է, որ երեք տարի առաջ իրենք ազատագրել են իրենց տարածքները, իսկ սեպտեմբերյան ռազմական գործողությունների մասին խոսելիս ասել է, որ երկրի ողջ տարածքում վերականգնել են ինքնիշխանությունը․
«ՄԱԿ-ի չորս բանաձևերը պահանջում էին Հայաստանի զինված ուժերի ամբողջական, անհապաղ և անվերապահ դուրսբերում մեր տարածքից: Սակայն այդ բանաձևերը 27 տարի շարունակ մնացին թղթի վրա։ Մենք մեր նահատակների կյանքի գնով ապահովել ենք այդ բանաձևերի կատարումը»,- ասել է նա։
Ալիևը նաև ասել է, թե իրենք այդպիսով վերջ են դրել հակամարտությանը. «Այս հակամարտության լուծման արդյունքում մենք պահպանեցինք մեր արժանապատվությունը և վերականգնեցինք միջազգային իրավունքը»,- նշել է նա։
«Այսօր մենք կարող ենք խաղաղության դարաշրջան թևակոխել Հարավային Կովկասում։ Սա մեր դիրքորոշումն է։ Համագործակցություն, փոխշահավետ նախագծեր, փոխադարձ օգուտ. այս ամենը մենք այսօր ցուցադրում ենք»,- հայտարարել է Ալիևը։
