News Georgia-ի փոխանցմամբ՝ Վրաստանի խորհրդարանի խոսնակ Դավիթ Բաքրաձեն Рустави-2 հեռուստաընկերության եթերում հայտարարել է, որ Վրաստանը գործնականում համապատասխանում է ՆԱՏՕ-ի բոլոր պահանջներին, որոնք անդամակցության համար ներկայացվում են թեկնածու երկրին.
«Վրաստանը դառնալու է ՆԱՏՕ-ի անդամ, և մենք պատրաստ ենք դրան։ Վերջին տարիներին մենք շատ ենք աշխատել այդ ուղղությամբ։ Ես կարող եմ համարձակորեն ասել, որ Վրաստանը գործնականում համապատասխանում է ՆԱՏՕ-ի բոլոր գործնական պահանջներին։
Սակայն ՆԱՏՕ-ին անդամակցելու գործընթացն արագ ու հեշտ չի լինի։ Մենք կփորձենք արագացնել այդ գործընթացը, և ՆԱՏՕ-ի գլխավոր քարտուղարի նոյեմբերյան այցը մեր երկիր կնպաստի դրան։ Դեռևս շատ վաղ է խոսել այն մասին, թե ինչպիսի արդյունքներ են գրանցվելու ՆԱՏՕ-ի խորհրդի և ՆԱՏՕ-Վրաստան հանձնաժողովի նիստերում։ Ամեն դեպքում դա ուժեղ քաղաքական ազդանշան է այն մասին, որ Վրաստանի և ՆԱՏՕ-ի հարաբերություններում Վրաստանը դիտարկվում է որպես գործընկեր»։
Բաքրաձեն նաև անդրադարձել է Ֆրանսիայի նախագահ Նիկոլա Սարկոզիի հոկտեմբերյան այցին՝ ընդգծելով, որ այդ այցի ընթացքում քննարկման գլխավոր թեմաներից մեկը լինելու է 2008 թվականի օգոստոսյան պատերազմից հետո կնքված հրադադարի համաձայնագիրը.
«Մենք շատ շնորհակալ ենք Ֆրանսիայի նախագահին, սակայն Ռուսաստանը վերջին 3 տարիներին ոչ մի քայլ չի արել հրադադարի համաձայնագրի ի կատար ածման համար՝ չհաշված Սաչխերի շրջանի Փերևի գյուղից իր զորքերի դուրսբերումը»։
Հիշեցնենք, որ ՆԱՏՕ-Վրաստան հանձնաժողովը ստեղծվել է 2008 թվականի սեպտեմբերին` որպես քաղաքական խորհրդատվության ու գործնական համագործակցության ֆորում, որը նպաստելու է ՆԱՏՕ-ին Վրաստանի անդամակցությանը:
