Իրանը պատրաստ է օգտագործել իր բոլոր հնարավորությունները տարածաշրջանում կայուն խաղաղության և կայունության հաստատման համար: Այս մասին նշված է Իրանի նախագահ Իբրահիմ Ռայիսիի՝ Հայաստանի Անկախության օրվա կապակցությամբ շնորհավորական ուղերձում, որը հրապարակված է IRNA-ում:
Իրանի նախագահ Իբրահիմ Ռայիսին առանձին ուղերձներով շնորհավորել է Հայաստանի նախագահին և վարչապետին՝ Անկախության օրվա առթիվ:
«Հարևանության քաղաքականության շրջանակներում Իրանը ձգտում է նպաստել Հարավային Կովկասի անվտանգությանը, մերձեցմանն ու բարգավաճմանը և պատրաստ է օգտագործել իր բոլոր հնարավորություններն այս տարածաշրջանում կայուն խաղաղության և կայունության հաստատման համար»,-գրել է Ռաիսին վարչապետ Նիկոլ Փաշինյանին հղած ուղերձում:
Նախագահ Վահագն Խաչատուրյանին ուղղված ուղերձում Ռաիսին ընդգծել է, որ վերջին տարիներին համագործակցության զարգացման աճող միտումը ցույց է տալիս Իրանի և Հայաստանի միջև հարաբերությունների ապագայի դրական և խոստումնալից հեռանկարը:
«Հուսով եմ, որ երկու բարեկամ և հարևան երկրների՝ Իրանի և Հայաստանի միջև հարաբերությունները կշարունակեն զարգանալ և խորանալ տարբեր ոլորտներում»,-ընդգծել է նա Խաչատուրյանին ուղղված ուղերձում:
