Այսօր Սիրիայում ընդդիմության կողմից հայտարարված է «ցասման օր», սակայն ոչ թե ընդդեմ Սիրիայի իշխանությունների, ինչպես սովորաբար լինում է, այլ Ռուսաստանի, որը շարունակում է աջակցել Սիրիայի գործող ռեժիմին և չի թաքցնում Բաշար Ալ-Ասադին օգնություն ցուցաբերելու իր մտադրությունները: Ռուսական կողմը մասնավորապես արգելափակում է Սիրիայի հարցով բանաձևի ընդունումը, որը ներկայացրել են արևմտյան երկրները:
Ավելին, Մեդվեդևը հայտարարել էր, որ «իրենք տեսնում են այն խնդիրները, որոնք կան Սիրիայում, և որի մասին բազմիցս ասվել է նաև Բաշար Ալ-Ասադին»: «Սակայն ես կարծում եմ, որ այն բանաձևերը, որոնք մենք ընդունում ենք, որպեսզի այսպես կոչված՝ խիստ ուղերձ հասցնենք Սիրիայի ղեկավարությանը, պետք է ուղղված լինեն երկու կողմերին, քանի որ այնտեղ իրավիճակը միանշանակ չէ»,- հավելել էր Մեդվեդևը:
Մինչդեռ երեկ Սիրիայում շարունակվել են բախումները, սպանվել է 22 ընդդիմադիր: Այս մասին հաղորդում է Reuters գործակալությունը` հղում անելով սիրիացի իրավապաշտպաններին: Հիմնականում զոհեր գրանցվել են Հոմս և Համա քաղաքներում:
