Հետընտրական առանցքային, գլխավոր ինտրիգը

Երևանի Ավագանու ընտրությունից հետո հանրային ուշադրության կենտրոնում հայտնված ինտրիգը Երևանի Ավագանիում հնարավոր կոալիցիայի հարցն է: Եթե անցողիկ շեմը հաղթահարած հինգ ուժերից երեքը՝ Հայկ Մարությանը, Մայր Հայաստան դաշինքն ու Հանրային ձայնը կազմեն կոալիցիա, ապա նրանք կարող են ընտրել քաղաքապետ, իսկ ՔՊ-Հանրապետություն հնարավոր կոալիցիայի պարագայյում պակասելու է մեկ մանդատ և նրանք դա պետք է որևէ կերպ կարողանան «յուրացնել» երեք խմբակցություններից մեկից, կամ՝ կատարել հետընտրական այնպիսի վերահաշվարկ, որը մինչ պաշտոնական արդյունքի հրապարակումը կբերի այնպիսի վերադասավորության, որ եռյակի տիրույթում գտնվող մեկ մանդատ կանցնի արդեն տանդեմի տիրույթ:

Այդպիսով, կա երեք տարբերակ՝ կամ եռյակի կոալիցիա, կամ տանդեմին հաջողվում է մեկ ձայն տանել եռյակից՝ քաղաքապետի ընտրության քվեարկությանը, կամ դա հաջողվում է անել վերահաշվարկի միջոցով: Այլապես, Ավագանին չի կարող ընտրել Երևանի քաղաքապետ, իսկ դա կնշանակի արտահերթ ընտրություն: Մտածել, թե արտահերթ ընտրությունը տալու է սկզբունքորեն այլ պատկեր, թերևս կլինի մոլորություն: Հետևաբար, ռացիոնալ է թերևս գտնել լուծում առկա իրավիճակում, որովհետև լուծման բացակայությունը չի պարունակելու հանրային և պետական իմաստով որևէ օգտակար հեռանկար, անկախ քաղաքական հայացքներից և համակրանքներից: Իհարկե լուծում գտնելն էլ առանձնապես օգտակարության մեծ հույս չէ, սակայն, կհաջողվի խուսափել ճգնաժամային վակուումից, որը կարող է իր բացասականն ազդեցությունն ունենալ ընդհանուր պետական կառավարման վրա: Եվ դա մի կարևոր շրջափուլում, երբ Հայաստանին անհրաժեշտ է լիովին հակառակը՝ առավելագույնս էֆեկտիվ կառավարում:

Բանն այն է, որ այդ պարագայում, իրավիճակը առավելագույն էֆեկտիվության ռեժիմ կպարտադրի նաև քաղաքական դաշտի խաղացողների համար: Ասել կուզի, քաղաքական դաշտում որևէ գործընթաց, որևէ խաղ՝ անկախ ամեն ինչից, պետք է կառուցվի այսպես ասած աճող նոտայի վրա, բարձր նոտայի վրա, այլ ոչ թե նվազող: Որպեսզի այդ հանգամանքը ստիպի քաղաքական դաշտի խաղացողներին՝ իշխանությունից մինչև տարբեր աստիճանի ընդդիմություններ, դրսևորել ստեղծագործական լրջմտություն և նորարարություն: Մեծ հաշվով, այստեղ է կարևորագույն, խորքային ինտրիգը, որ առկա է ամեն ընտրությունից հետո:

Լուսանկարը՝ panorama.am-ի