Իսրայելի ԱԳ նախարար Ավիգդոր Լիբերմանը հանձնարարել է միջազգային ասպարեզում Թուրքիային հակազդելու միջոցներ մշակել, դրանց թվում` հայերին և քրդերին սատարելու միջոցով: Համաձայն լրատվամիջոցների տեղեկությունների` «Լիբերմանի պլանի» շրջանակներում այս ամիս ԱՄՆ կատարելիք այցի ընթացքում սպասվում է Իսրայելի ԱԳ նախարարի հանդիպումը հայկական լոբբիի ղեկավարների հետ։ Սպասվում է նաև, որ նա վերջիններիս կառաջարկի թուրքերի դեմ պայքարել Կոնգրեսում։ Սա կարող է նշանակել Իսրայելի աջակցություն Հայոց ցեղասպանության միջազգային ճանաչման հարցում, որը Թուրքիայի համար ուժեղ հարված կլինի։ Բացի այդ, Իսրայելը կարող է հայերին սատարել Թուրքիայի հետ Արարատի վերահսկողության վերաբերյալ հակամարտության հարցում:
Թուրքագետ Ռուբեն Մելքոնյանն «Առաջին լրատվականի» հետ զրույցում նշեց, որ Հայաստանը որևէ ձևով այդ գործընթացներին չպետք է մասնակցի, քանի որ Իսրայելի այդ քայլն ունի հստակ քաղաքական ենթատեքստ, և վերջինս մեկ անգամ ևս փորձում է Հայոց ցեղասպանության փաստն օգտագործել քաղաքական նպատակներով, և բնականաբար, նրանց այս քայլը չի կարող գնահատվել անկեղծ. «Իսրայելն այս պահին ոչ թե փորձում է դատապարտել Թուրքիայի կողմից մարդկության դեմ գործած հանցանքը, այլ փորձում է մեր ազգային ողբերգությունը դարձնել իր քաղաքական առևտրի և ճնշումների մի տարր, որը մեզ համար ընդունելի չէ»:
Մելքոնյանը նաև նկատեց, որ վաղ թե ուշ թուրք-իսրայելական հարաբերությունները կկարգավորվեն, իսկ Հայաստանի չափից ավելի ակտիվ ներգրավվածությունն այդ կոնֆլիկտում կարող է խիստ բացասական հետևանք առաջացնել Հայաստանի համար. «Հայաստանի, սփյուռքի, Հայ դատի և հայկական որևէ կազմակերպության ակտիվ ներգրավվածությունը այս հարցում ցանկալի չէ, ավելին՝ կարծում եմ, որ սխալ է»:
Թուրքագետը նաև հավելեց, որ այս հարցի առնչությամբ հայկական կողմից փոքր-ինչ խիստ նոտայով հայտարարություն պետք է լինի՝ առ այն, որ անթույլատրելի է մեր ողբերգության օգտագործումը քաղաքական նպատակներով: Մելքոնյանը նաև հիշեց, թե ինչպես մի քանի տարի առաջ նույն այդ Լիբերմանը և նրա ղեկավարած գերատեսչությունն ու իսրայելական լոբբին աշխատում էին Հայոց ցեղասպանության միջազգային ճանաչման դեմ և սատարում Թուրքիային. «Լիբերմանի հայտարարությունը պետք է դիտել բարոյական հարթության մեջ, իսկ այդ պարագայում Իսրայելի քայլը չի կարելի համարել ճիշտ»:
