Երևանի ավագանու ընտրություններին մասնակցող քաղաքական ուժերը մայրաքաղաքի քաղաքաշինական խնդիրները լուծելու տարբեր տեսակետներ են առաջարկում, մոտեցումները, լուծումները հաճախ իրար հակասում են, որոշ դեպքերում անգամ՝ հատվում: Քաղաքական ուժերի ներկայացուցիչներն իրենց տեսակետները ներկայացրին Երևանի քաղաքաշինական խնդիրների, քաղաքի ենթակառուցվածքների վիճակի վերաբերյալ քննարկմանը:
«Լուսավոր Հայաստան» կուսակցությունն, օրինակ, քաղաքի «Մաստեր պլան» ներդնելու անհրաժեշտություն է տեսնում:
«Մաստեր պլանն» ընդգրկելու է նաև գլխավոր հատակագիծը, բայց ենթադրում է ավելի լայն, քաղաքի զարգացման փաստաթուղթ, որով պետք է կանոնակարգվի ամբողջ կառուցապատումը: «Մաստեր պլանը» ոչ միայն նեղ մասնագիտական փաստաթուղթ է, այլ նաև խիստ փոխկապակցված է քաղաքի զարգացման մեր տեսլականի հետ, ուստի դրա վրա պետք է աշխատի ոչ միայն քաղաքային իշխանության մասնագիտական բլոկը, այլ նաև պետք է հրավիրվեն մասնագետներ: Եվ սա պետք է լինի համապարփակ փաստաթուղթ»,-ասաց կուսակցության թեկնածուների ցուցակը գլխավորող Դավիթ Խաժակյանը, ով նաև ավագանու «Լույս» խմբակցության ղեկավարն է:
Խաժակյանը քաղաքաշինական կարևոր խնդիր համարեց նաև Երևանում առկա բազմաթիվ սեփական տները, որոնց կարգավիճակը հստակեցված չէ, հետևաբար գույքահարկ չեն վճարում: «Եվ մենք կարծում ենք, որ սեփական տների թաղամասում քանի ինքնակամ շինություններ ունենք, պետք է օրինականացվեն»,-ասաց Խաժակյանը:
«Ապրելու երկիր» կուսակցության թեկնածու Տելեմակ Անանյանն էլ հետևյալ տարբերակն է առաջարկում. «Կա հայտնի տեսաբանի մի խոսք՝ քաղաքն ինչպես էլ որ զարգանա, վեր է ածվելու օղակաշարաձև համակարգի, եթե ռելիեֆը թույլ է տալիս: Երևանն ունի այս սկզբունքը: Օղակաշարաձև համակարգը թերի է, մենք պարտավոր ենք այդ օղակն ավարտել, խոսքն Այգեստանի 12 փողոցի մասին է, այն պետք է Նորքի Զանգվածից, Մյասնիկյանից բեռնաթափի ու ավարտի օղակը, հատի Տիգրան Մեծը, Արշակունյացը և միանա Մոնեթե Մելքոնյանին՝ Իսակովի մոտ»:
Այսպիսով՝ Անանյանն, ըստ էության, առաջարկում է կենտրոնը շրջանցող ճանապարհ:
Նա նշեց՝ իրենք իրենց քաղաքաշինական ծրագրով առաջարկել են այդ օղակը՝ մոտ 500 մլն դոլարի ծրագիր: Թեև դա շատ մեծ գումար է, սակայն Անանյանը համոզված է, որ դա պետք է անել՝ նույնիսկ կառավարության, մասնավոր-պետական համագործակցությամբ: Այսպիսով՝ «Ապրելու երկիր» կուսակցությունը առաջնային խնդիրներից է համարում այդ օղակի իրականացումը:
Անանյանը նաև քննադատեց իշխող ուժին, մեղադրեց ճարտարապետության նկատմամբ արհամարհական վերաբերմունք ունենալու մեջ՝ հիշեցնելով, որ աշխատանքից ազատել են գլխավոր ճարտարապետին, լուծարել են այդ ինստիտուտը:
Երևանի քաղաքապետի տեղակալ, Երևանի ավագանու անդամի «Քաղաքացիական պայմանագիր» կուսակցության թեկնածու Ստեփան Մաչյանն էլ, անդրադառնալով այդ քննադատությանն, ասաց. «Թյուր է պատկերացումը, թե մեկ ճարտարապետ կարող է իր վրա վերցնել և կառավարել այնպիսի ահռելի աշխատանք, ինչպիսին Երևանի քաղաքաշինությունն է: Երևանի գլխավոր ճարտարապետի հաստիքը կրճատվել է, դրա փոխարեն մենք առաջարկել ենք շատ ավելի լավ լուծում՝ ճարտարապետական խորհուրդ, որտեղ ներգրավել ենք 5 պրոֆեսիոնալ մասնագետների: Եվ որոշումները կայացվում են ոչ թե միանձնյա՝ մարդու տպավորություններից, էմոցիաներից կախված, այլ քննարկումների հիման վրա: Խորհրդի ձևավորմամբ քաղաքապետն իր լիազորությունները փոխանցել է մասնագետներին»:
Մաչյանը նաև շեշտեց, որ իրենց կարգավորումների ուղղությունը գլխավոր հատակագիծն է: Մաչյանը թյուր համարեց տեսակետը, թե քաղաքը գլխավոր հատակագիծ չունի, կա գլխավոր հատակագիծ, որի ժամկետը սպառվել է 2020-ին ու երկարաձգվել է, դրանով առաջնորդվում են ամենօրյա աշխատանքներում: Մաչյանը որպես հաջորդ կարևոր ուղղություն նշեց տեղեկատվական համակարգերի ներդրումը: «Մենք արդեն պիլոտային փուլն անցել ենք, GIS-ի՝ այսինքն՝ քաղաքաշինության ոլորտում տեղեկատվական համակարգի ներդրման փուլում ենք: Կան պատրաստի լուծումներ, որոնք պետք է ներդրվեն քաղաքաշինության բնագավառի բոլոր ոլորտներում: Մենք աշխատում ենք գլխավոր հատակագիծը ստանալ թվային»,-ասաց նա:
Մաչյանը վստահեցրեց, որ վերջին տարիներին իրականացրել են և շարունակելու են իրականացնել աննախադեպ, քաղաքի համար մեծ նշանակություն ունեցող քաղաքաշինական ծրագրեր:
Երևանի ավագանու անդամի թեկնածու «Հաղթանակ» կուսակցությունը ևս կարևորություն է տալիս ռազմավարական «մաստեր պլանին»՝ գոնե մոտակա 20-30 տարիների ընթացքում: «Ինչ վերաբերում է շինարարությանը, մենք շատ կարևոր ենք համարում, որ տարբեր վարչական շրջաններում, տարբեր գոտիներում մոտեցումը տարբերվի: Օրինակ՝ փոքր կենտրոնում քաղաքաշինության մոտեցումները պետք է տարբեր լինեն, պետք է հաշվի առնվի ճարտարապետական տեսքը: Մեր կարծիքով օրենքում պետք է փոփոխություն կատարվի, փոքր կենտրոնը ճանաչվի հատուկ կարգավորվող գոտի, որի շրջանակում կարողանանք այդ փոփոխություններն իրականացնել»,-ասաց Արման Ավետիսյանը:
