ԱՊՀ երկրների վարչապետների խորհրդի՝ հոկտեմբերի 27-ին Բիշքեկում կայանալիք նիստում, ի թիվս այլ հարցերի, կքննարկվեն 2024 թ.-ի Համագործակցության միասնական բյուջեի ձևավորումը, ԱՊՀ երկրների հակաօդային պաշտպանության (ՀՕՊ) համակարգի ֆինանսավորումը։ Այս մասին հաղորդում է БелТА-ն՝ վկայակոչելով է ԱՊՀ գլխավոր քարտուղար Սերգեյ Լեբեդևին:
Նա նշել է, որ խորհրդի հիմնական օրակարգն արդեն ձևավորվել է։ Դրանում տեղ կգտնեն տնտեսական և հումանիտար հարցեր, ԱՊՀ-ի մարմինների գործունեության ֆինանսավորման վերաբերյալ հարցեր։
«Մասնավորապես, ֆինանսական հարցերը կզբաղեցնեն օրակարգի մեծ մասը. դրանք 11 հարցեր են, որոնք վերաբերում են ԱՊՀ-ի երկրների՝ հաջորդ տարվա միասնական բյուջեի ձևավորմանը, Հումանիտար համագործակցության միջպետական հիմնադրամի ֆինանսավորմանը, 2024 թ.-ին ԱՊՀ երկրների ՀՕՊ համակարգի ֆինանսավորմանը», – հայտնել է նա։
Ըստ գլխավոր քարտուղարի՝ վարչապետներին կառաջարկվի քննարկել համատեղ գործունեության մի քանի ծրագրեր։
«Կառավարությունների ղեկավարներին կառաջարկվի հաստատել այն միջոցառումների պլանը, որոնք կապված են Հայրենական մեծ պատերազմում տարած հաղթանակի 80-ամյակի հետ: Դա կնշվի 2025 թվականին: Պետությունների ղեկավարներն արդեն որոշում են ընդունել 2025 թ.-ին ԱՊՀ-ում հայտարարել Հայրենական մեծ պատերազմում տարած հաղթանակի 80-ամյակի տարի: Համագործակցության բոլոր երկրները, որոնց ժողովուրդները մասնակցել են ֆաշիզմի դեմ պայքարին, այդ օրվան նվիրված համապատասխան կարևոր միջոցառումներ կանցկացնեն իրենց երկրներում», – պարզաբանել է նա։
