«Առաջին լրատվական»-ի իրազեկ աղբյուրներից հայտնի է դարձել, որ ՀՀ նախագահի աշխատակազմի արդեն նախկին ղեկավար Կարեն Կարապետյանը քաղաքականությունն ընդմիշտ թողնելու որոշում է կայացրել: Նախագահի աշխատակազմի պաշտոնը թողնելու որոշումը հասունացել է սկսած 2010 թ. վերջից, երբ Երևանի քաղաքապետի պաշտոնից հրաժարվելու դիմում ներկայացրեց Գագիկ Բեգլարյանը: Դրանից հետո հրաժարականի դիմում էր ներկայացրել նաև Կարեն Կարապետյանը, սակայն շուտով, կուսակիցների համառ խնդրանքներից հետո, հետ էր վերցրել դիմումը:
Այս ամիսների ընթացքում Կարեն Կարապետյանը համարվել է վարչապետի ամենահավանական թեկնածուներից մեկը: Տիգրան Սարգսյանի հետ, մեղմ ասած, ոչ բարեկամական հարաբերությունները ավելի օրհասական էին դարձնում նրա՝ գործադիրի ղեկավարի պաշտոնում հայտնվելու հավանականությունն ու ցանկությունը: Սակայն գնալով՝ Կարեն Կարապետյանն ավելի էր համոզվում, որ, անկախ Տիգրան Սարգսյանի վարած տնտեսական քաղաքականության անարդյունավետությունից և երկրի օրավուր վատթարացող սոցիալական և տնտեսական ծայրաստիճան վատ վիճակից, Սերժ Սարգսյանը պաշտոնանկ չի անելու վարչապետին:
Սեպտեմբերի 8-ի երեկոյան հրաժարվելու որոշումը, Կարեն Կարապետյանը մտքում վերջնականապես հասունանալուց հետո, հասու էր դարձել ընտանիքի նեղ շրջանակին: Նրա հրաժարականը և քաղաքականությունից դուրս գալու որոշումը անակնկալ է եղել ոչ միայն Սերժ Սարգսյանի, այլև նույնիսկ նրա ամենամոտ ընկերների համար:
