Լեհաստանում հոկտեմբերի 15-ին խորհրդարանական ընտրությունների հետ միաժամանակ հանրաքվե կանցկացվի փախստականների վերաբերյալ Եվրամիության փոխզիջումային ծրագրի և երեք այլ թեմաների շուրջ։ Այս որոշումը Լեհաստանի Սեյմն ընդունել է օգոստոսի 17-ին` 451 պատգամավորներից 234-ի ձայներով։ Այդ մասին գրում է Deutsche Welle-ի ռուսական ծառայությունը:
Ընդդիմության ներկայացուցիչները Վարշավայի ազգային պահպանողական կառավարությանը մեղադրել են հանրաքվեի միջոցով խորհրդարանական ընտրությունների արդյունքների վրա ազդելու և նախընտրական պայքարի վրա պետական միջոցները ծախսելու մտադրության մեջ։
Իշխող «Օրենք և արդարություն» կուսակցության առաջարկությամբ հանրաքվեի կներկայացվի չորս հարց. դրանցից մեկը վերաբերում է փախստականների պարտադիր ընդունման առնչությամբ ԵՄ-ի փոխզիջումներին։ Հարցը հնչում է այսպես. «Դուք հավանություն տալի՞ս եք արդյոք Մերձավոր Արևելքից և Աֆրիկայից հազարավոր անօրինական միգրանտների ընդունմանը եվրոպական բյուրոկրատիայի կողմից հաստատված պարտադիր ընդունման մեխանիզմով»։
Պարբերականը նշում է, որ այս քվեարկության արդյունքը հետևանքներ չի ունենա ԵՄ-ի ներսում որոշումների ընդունման գործընթացի համար։
Հունիսի սկզբին Եվրամիության պետությունների ներքին գործերի նախարարները համաձայնեցրել են ապաստան տրամադրելու քաղաքականության բարեփոխումը: Ենթադրվում է, որ փախստականների ընդունումը ԵՄ-ում այսուհետ կիրականացվի ոչ թե կամավոր, այլ հարկադիր հիմունքներով։ Այն երկրները, որոնք հրաժարվում են ընդունել փախստականներին, ստիպված կլինեն փոխհատուցում վճարել Եվրամիությանը։
