Եվրոպայի խորհրդի խորհրդարանական վեհաժողովի (ԵԽԽՎ) Հավասար հնարավորությունների հանձնաժողովը տեղեկացնում է, որ նախքան երեխայի ծնվելը նրա սեռի ընտրությունը «անհանգստացող չափերի» է հասել Եվրախորհրդի մի շարք երկրներում` այդ թվում Հայաստանում, Ադրբեջանում և Վրաստանում:
Ինչպես հայտնում է «Ազատություն» ռադիոկայանը, տղաների և աղջիկների բնական հարաբերակցությունը 105/100 է, սակայն Հայաստանում և Ադրբեջանում այդ ցուցանիշը 112/100 է, իսկ Վրաստանում 111/100:
Շվեյցարացի պատգամավոր Դորիս Սթամփի զեկույցում ասվում է այն մասին, որ ԵԽԽՎ-ն դատապարտում է նախածննդյան փուլում հօգուտ տղաների սեռի ընտրությունը, ինչի արմատները գենդերային անհավասարություն ունեցող մշակույթներում են և այդ երևույթը հակասում է ԵԽ արժեքներին: Պատգամավորը կոչ է անում տարածաշրջանի երկրներին հետաքննություն սկսել այս հարցի կապակցությամբ, ինչպես նաև մեծացնել կնոջ դերը հասարակության մեջ:
