Ադրբեջանի նախագահ Ալիևը Բաքվից հասել է Ղազախի շրջան, որտեղ մասնակցել է մի քանի սոցիալական նախագծերի բացման, ինչպես նաև ծանոթացել Ղազախի շրջանում սահմանապահ զորքի ծառայությանը: Ալիևը այցելել է փաստորեն Տավուշի մարզին սահմանակից գոտի, որի առնչությամբ Ադրբեջանն ինչպես հայտնի է ունի այսպես կոչված «անկլավային» հավակնություններ: Արդյո՞ք միայն սոցիալական ծրագրերին ու սահմանապահ ծառայությանը ծանոթանալու նպատակով է Ալիևը կտրել բավականին երկար ճանապարհ Բաքվից, թե՞ նրա այցելությունը ունի առավել ուշադիր զննության, առավել մեծ ուշադրության կարիք: Թերևս երկրորդը, հաշվի առնելով այն, որ ռեգիոնում իսկապես նշմարվում է ամպերի կուտակման գործընթաց, հատկապես այն զարգացումների ֆոնին, որ ծավալվում են Ուկրաինայում: Ուկրաինայում կարծես թե ձևավորվում է պատերազմի «լճացում», երբ կողմերը մղում են արյունալի մարտեր, սակայն գործնականում առկա է որոշակիորեն ստատիկ իրավիճակ:
Զուգահեռ, ուկրաինական հարցում առավել դինամիկ են դառնում խոսակցությունները այսպես ասած կարգավորման հնարավորությունների մասին, ու թեև դրանք ներկայումս փակուղային բնույթի են, այդուհանդերձ դրանց ինտենսիվացումը վկայում է պահանջարկի աճի մասին: Իսկ, ահա կովկասյան ուղղությամբ կարծես թե կա հակառակ լիցքերի կուտակում: Հայ-ադրբեջանական այսպես ասած խաղաղ բանակցության գործընթացում չկա էական փոփոխություն և որևէ միջնորդ էական ջանք չի գործադրում հավասարակշռված իրավիճակ ստանալու համար: Դա առավել հանդուգն է դարձնում Բաքվին, որը շարունակում է թե Հայաստանի, թե Արցախի հետ խոսել վերջնագրային լեզվով: Կա բարձր հավանականություն, որ բանակցային հերթական ռաունդին ընդառաջ Ադրբեջանը կարող է փորձել ուժային գործոնը կիրառել Հայաստանի հանդեպ ճնշման համար, օգտագործելով Կովկասի ուղղությամբ աշխարհաքաղաքական դիմակայության սրացման հանգամանքները: Այդ առնչությամբ, թերևս վճռորոշ է լինելու Պուտին-Էրդողան հանդիպումը, որ սպասվում է օգոստոսի վերջին Անկարայում:
Ըստ ամենայնի, Ալիևի այցը Տավուշին սահմանակից ղազախյան գոտի, ունի Պուտին-Էրդողան հանդիպման հնարավոր «արդյունքներին» պատրաստվելու նպատակ, հատկապես նկատի ունենալով այն, որ այս օրերին Հայաստանի և Ադրբեջանի հարաբերության հետ կապված հարցերը Թուրքիայի հետ քննարկում է նաև Վաշինգտոնը: Հատկանշական է նաև, որ նախօրեին Հայաստանի անվտանգության խորհրդի քարտուղար Գրիգորյանը զանգահարել է իրանցի իր նորանշանակ գործընկերոջը, շնորհավորելով նրան պաշտոնի կապակցությամբ և քննարկելով երկկողմ հետաքրքրության հարցեր:
