Վերջին շրջանում լուրեր են շրջանառվում, որ վարչապետ Տիգրան Սարգսյանը պատրաստվում է համալրել Վազգեն Մանուկյանի գլխավորած ԱԺՄ կուսակցության շարքերը, որի անդամն է եղել ժամանակին:
Կուսակցության և Հանրային խորհրդի նախագահ Վազգեն Մանուկյանը, մեզ հետ զրույցում ևս մեկ անգամ լսելով այս խոսակցությունների մասին, նախ ծիծաղեց, ապա ասաց. «Այդ խոսակցությունների մեջ ծիծաղելի էլեմենտներ կան: Կուսակցությունը, իհարկե, ակտիվանում է, որովհետև առաջիկայում ընտրություններ են: Դրանից բացի՝ վերամիավորվելու տարբեր առաջարկություններ կան և այլն: Դա գործընթաց է, և չգիտեմ՝ ինչ արդյունքների կբերի:
Ինչ վերաբերում է, որ վարչապետը պատրաստվում է միանալ ԱԺՄ-ին, ապա նա վաղուց ի վեր ՀՀԿ-ում է, հետևաբար ինչո՞ւ պետք է դուրս գա «Հանրապետական» կուսակցությունից և մտնի ուրիշ կուսակցություն: Ճիշտն ասած, այդ լուրերը այնքան անբնական են, որ նույնիսկ քննարկելու ենթակա չեն»: