Նոյեմբերյանում սեպտեմբերի 2-ին 17-ամյա աղջկա բռնաբարության դեպքի առթիվ քրեական գործ է հարուցվել` ՀՀ քր.օր.-ի 138` բռնաբարություն, հոդվածի հատկանիշներով: Նշանակվել են մի շարք փորձաքննություններ, և ներկա պահին նախաքննությունը դեռ ընթանում է:
Հիշեցնենք, որ 17-ամյա Լ.Ն.-ն ասում էր, որ իրեն բռնաբարել են երեք 17-ամյա երիտասարդներ, որոնցից մեկը Նոյեմբերյանի քաղաքապետ Վանուշ Ամիրաղյանի որդին է, իսկ երկրորդը` ոստիկանության աշխատակիցներից մեկի որդին: Անչափահասի բռնաբարության դեպքի հետ կապված հարցաքննվել է Նոյեմբերյանի քաղաքապետ Վանուշ Ամիրաղյանի որդին, սակայն ներկա պահին կալանավորվածներ և ձերբակալվածներ չկան:
Նոյեմբերյանում աղջկան ճանաչողները նշում են, որ նա թեթևաբարո վարքի տեր աղջիկ է, և տղաների հետ հանդիպումը պարզապես որպես առիթ է օգտագործել` նրանցից ամենայն հավանականությամբ գումար կորզելու համար: Ու երբ հասկացել է, որ տղաները չեն ցանկանում իր հետ հարաբերություն ունենալ, դիմել է նրանցից գումար կորզելու, շանտաժ անելու այդ տարբերակին:
Երեկ մենք զրուցեցինք նաև անձամբ Նոյեմբերյանի քաղաքապետ Վանուշ Ամիրաղյանի հետ, ով նշեց, որ այդ լուրերը իրականությանը չեն համապատասխանում, քանի որ նման բան չի եղել: «Ավելին` քննությունը շարունակվում է, և մի քանի օրից կպարզվի, ու իրականությունը բոլորին հայտնի կլինի»,- նշեց քաղաքապետը: Մեր այն դիտարկմանը, թե այստեղ քաղաքական պատվեր տեսնո՞ւմ է, որովհետև Նոյեմբերյանում լուրեր են շրջանառվում, որ բռնաբարվածը թեթև վարքի անչափահաս է, պատասխանեց. «Այդ վարկածը չի բացառվում: Այո՛, հակառակ դեպքում, եթե հանկարծ նման բաներ էլ լինում են, դրանք չեն բարձրաձայնվում: Մարդիկ աշխատում են, որքան հնարավոր է, գաղտնի պահել կատարվածը: Միանշանակ կարող եմ ասել, որ այդ աղջիկը թեթևաբարո վարքի տեր է: Բայց նաև կարող եմ ասել, որ նա եկել և հայտարարություն է տվել, որ իրեն չեն բռնաբարել: Համայնքից և դպրոցից ներկայացված բնութագրում ամեն ինչ ասվում է, որ ծանոթանաք` արդեն ամեն ինչ պարզ կդառնա: Իսկ առաջիկայում այդ ամենին վերջակետ կդնի դատական բժշկի փորձաքննությունը: Ես կնախընտրեի պաշտոնական փաստարկներով խոսել, հետևաբար առայժմ կսահմանափակվեմ այսքանով և ավելին խոստանում եմ ասել մի քանի օրից, երբ քննությունը կավարտվի»:
Մենք զրուցեցինք նաև Նոյեմբերյանի ոստիկանության քննչական բաժանմունքի պետ Գագիկ Նասիբյանի հետ, ով նշեց, որ քննությունը դեռ ընթացքի մեջ է, հետևաբար չի կարող մանրամասներ հաղորդել և ասել, թե գործը ներկա պահին ինչ ընթացքի մեջ է և ինչ նորություններ կան: Մեր այն դիտարկմանը, թե նախնական վարկածով բռնաբարվածը մեղադրանքը հե՞տ է վերցրել, թե՞ ոչ` արձագանքեց. «Գործը ձեր ասած ընթացքում է: Ես չեմ կարող ավելին ասել, որովհետև գաղտնիության սկզբունք, էթիկա գոյություն ունի: Ինձ ճիշտ հասկացեք, քրեական գործն է գաղտնիություն պահանջում»: Իսկ այն հարցերին, թե ճի՞շտ է, որ աղջիկը թեթևաբարո վարքի տեր է և քաղաքապետի որդին որպես մեղադրյալ ներգրավվել է գործում` պատասխանեց. «Աղջկա վարքի հետ կապված որոշակի բաներ, այո, իրականությանը համապատասխանում են: Սակայն ներկա պահին որպես մեղադրյալ ոչ ոքի չենք ներգրավել: Կխնդրեմ, որ ներկա պահին ավել հարցեր չտաք, պարզապես խնդրում եմ»:
Ի դեպ, այս պահի դրությամբ ասվում է, որ բռնության հետքեր չկան, և պետք է սպասել դատաբժշկական փորձաքննության եզրակացությանը: Ամեն դեպքում, պարոն Նասիբյանից հարկ համարեցինք հետաքրքրվել, թե փորձաքննությունը ի՞նչ է պարզել` աղջիկը մինչև բռնաբարվելը կո՞ւյս է եղել. «Դա փորձաքննությունը ցույց կտա, բայց երբ իրենից հարցրեցի, ասաց, որ կույս չի եղել»:
«Ժամանակ»
