Արցախյան կողմը չի մերժել ԱՄՆ միջնորդությամբ՝ երրորդ երկրում, Բաքու- Ստեփանակերտ բանակցությունների առաջարկը, սակայն նման հանդիպումը պետք է համապատասխանի որոշ չափորոշիչների ու լինի կառուցողական։ Այսօր հայտարարել է Արցախի Հանրապետության Արտաքին գործերի նախարար Սերգեյ Ղազարյանը՝ նշելով, որ այդ ուղղությամբ քննարկումները դեռևս շարունակվում են։ Ղազարյանը նաև հայտնեց, որ նմանատիպ հանդիպումներ կազմակերպելու առաջարկներ ստացել են նաեւ այլ երկրների ու միջազգային կազմակերպությունների ներկայացուցիչներից ։
«Մենք ասում ենք, որպեսզի դա անվանենք երկխոսություն և ոչ թե երկխոսության իմիտացիա, ապա պետք է բավարարվեն մի քանի պահանջներ՝ վերացվի ճանապարհների արգելափակումը դեպի Արցախ, վերականգնվի պարենի և առաջին անհրաժեշտության ապրանքների ներկրման հնարավորությունը։ Նախապայման որպես այդպիսին չենք անվանում, բայց մյուս կողմն էլ պետք է ցույց տա, որ պատրաստ է երկխոսության»,- հայտարարեց նա։
Արցախի արտգործնախարարը հիշեցրեց դեռևս ամիսներ առաջ ռուսական կողմի միջնորդությամբ կայացած երկու հանդիպումների մասին։ Իր խոսքով՝ այդ ընթացքում կողմերը քննարկել են տեխնիկական հարցեր, սակայն հետագայում ադրբեջանական կողմը խեղաթյուրել էր հանդիպման իմաստը՝ դա ներկայացնելով, իբր, «վերաինտեգրման շուրջ բանակցությունների մեկնարկ»։
