ՀԱԿ անդամ, գլխավոր դատախազի նախկին տեղակալ Գագիկ Ջհանգիրյանը իր խոսքում նշեց, որ երկիրը օր օրի հետ է գլորվում և կորցնում ազատության վերջին բեկորները: «Եկեք սեպտեմբեր-հոկտեմբերին Ազատության հրապարակ վերադարձնել 2008թ.-ի փետրվարը, քանի որ այս իշխանությունները ի վիճակի չեն կասեցնել երկրի գահավիժումը»,- առաջարկեց Գագիկ Ջհանգիրյանը:
Նա հիշեցրեց, որ Մարտի 1-ի բացահայտման Սերժ Սարգսյանի հրահանգից անցել է 5 ամիս, բայց սայլը տեղից չի շարժվում: Մարտի 1-ի սպանությունից 3.5 տարի է անցել, իսկ պատասխանատու պաշտոնյաները շարունակում են առոք-փառոք պաշտոնավարել:
Գագիկ Ջհանգիրյանը նշեց, որ Մարտի 1-ի ապօրինի զինված խմբերի և զենքերի կիրառման փաստերը չեն ստուգվել: Բացի բանակային, ոստիկանական ստորաբաժանումներից, Մարտի 1-ին մասնակցել են ԼՂՀ ոստիկանության հատուկ նշանակության ստորաբաժանումները:
Ավելին՝ նրանք բացահայտման հարցում այդքան անկարող չեն, ինչպես որ ներկայանում են: Մի շարք փաստարկներ բերելով՝ նա եկավ այն եզրակացության, որ մարտի 1-ը չի բացահայտվում, որովհետև իշխանությունը կամք չի դրսևորում: Իսկ ապագա Մարտի 1-ի կանխարգելման համար անհրաժեշտ է պայքար, պայքար մինչև վերջ:
