Խաբարովսկի երկրամասում` Լազոյի անվան շրջանում, ամուրյան վագրը հարձակվել է փայտամթերման խմբի աշխատողի վրա: Այդ մասին տեղեկանում է ТАСС գործակալությունից։
«Խիստ հյուծված վագրը հարձակվել է անտառամթերման բրիգադի աշխատողի վրա Լազոյի անվան մունիցիպալ շրջանի Զոլոտոյ գյուղից 5 կմ հեռավորության վրա գտնվող անտառամասում», – հաղորդվել է տարածաշրջանի կառավարության որսորդական տնտեսության վարչության Telegram ալիքում։
Նշվում է, որ տղամարդը միայն թեթև մարմնական վնասվածքներ է ստացել:
Խաբարովսկի երկրամասում այս տարի մարդիկ ավելի հաճախ են վտանգավոր իրավիճակներում հայտնվում Կարմիր գրքում գրանցված գիշատիչների պատճառով։ Դրա հիմնական պատճառներից մեկը դարձել է այն, որ խոզերի աֆրիկյան ժանտախտի պատճառով կրճատվել է վարազների պոպուլյացիան՝ վագրի ավանդական կերային բազան։ Տարածաշրջանում իրավիճակը շտկելու համար ստորագրվել է որոշում երկկճղակավորների այդ տեսակի որսը երեք տարով արգելելու մասին։
Վագրերը հաճախ են մտնում բնակավայրեր։ Փետրվարին տայգայի Սովետսկո Գավանի շրջանում գտել են մարդու մամին, որը մահացել է, ենթադրաբար, վագրի հարձակման հետևանքով։ Այնուհետև հայտնի դարձավ, որ ամուրյան վագրը հարձակվել է որսորդների վրա Խաբարովսկի երկրամասի Նանայսկի շրջանի տայգայի ձմեռանոցում։ Վագրը հարձակվել է նաև անտառամթերման բրիգադից մի տղամարդու վրա, երբ նա նորոգում էր տրակտորը․ նրան ծանր վիճակում տեղափոխել են հիվանդանոց:
