Բավականին դրական ազդեցություն ունեցավ անցակետում հավելյալ նոր գոտիների բացելը, շատ արագ կուտակումները Վրաստանի տարածքում, որ ունեինք մինչև Նատախտարի գյուղ, ամբողջը մաքրվեց: Այս մասին «Առաջին լրատվական»-ի հետ զրույցում նշեց բեռնափոխադրող ընկերության տնօրեն Վարուժան Քոլյանը:
«Հիմա երբ բեռնատարները անցնում են Բագրատաշենի անցակետից, կանգառը անմիջապես Վրաստանի տարածքում գտնվող պարկում է լինում, որտեղից արդեն հերթականությամբ մեքենաները բաց են թողնում և գնում են դեպի սահմանային անցակետ: Այս պահին խնդիր ունենք Բագրատաշենի թողունակության հետ կապված:
Վերջին շրջանում բավականին մեծ քանակությամբ մաքսանենգ ապրանք հայտնաբերվեց, հետևաբար ուժեղացրել են հսկողությունը և մի փոքր դանդաղել են Բագրատաշենի մաքսատան աշխատանքները:
Օրինակ, այս պահին կեռասով ու ծիրանով բեռնված մեքենաները, որոնք շուտ փչացող ապրանքներ են, բայց Բագրատաշենի անցակետի մոտ արդեն մի քանի օր հերթեր ունենք: Եվ նմանատիպ խնդիր ունենք բավականին երկար ժամանակ Վրաստանի կողմից դեպի Հայաստան հատող սահմանային անցակետերում»,-ասաց նա:
