Vesti.ru-ի փոխանցմամբ՝ ԵՄ ընդլայնման և եվրոպական հարևանության հարցերով եվրակոմիսար Շտեֆան Ֆյուլեն Թուրքիայից պահանջել է դադարեցնել Կիպրոսին հասցեագրած սպառնալիքները։
Ֆյուլեն Անկարային կոչ է արել հրաժարվել ամեն տիպի սպառնալիքներից ու այնպիսի գործողություններից, որոնք կարող են բացասաբար անդրադառնալ բարիդրացիական հարաբերությունների և սահմանային վեճերի խաղաղ կարգավորման վրա։ Բացի այդ, Ֆյուլեն ափսոսանք է հայտնել Թուրքիայի ղեկավարության այն հայտարարությունների կապակցությամբ, որոնք չեն նպաստում տվյալ տարածաշրջանում խաղաղ կարգավորման ձեռքբերմանը։
Ֆյուլեն նշել է. «Եվրահանձնաժողովը կանոնավորապես այս հարցերը բարձրացնում է Թուրքիայի հետ բանակցությունների ժամանակ և շարունակելու է հետևել Անկարայի կողմից բարիդրացիական հարաբերությունների աջակցմանն ուղղված սեփական պարտավորությունների կատարմանը։
ԵՄ-ը հաստատում է իր անդամի (Կիպրոս) ինքնիշխան իրավունքները, որոնք իրենցում ներառում են ԵՄ-ի նորմերին համապատասխան երկկողմանի համաձայնագրերի կնքման իրավունքը, այդ թվում՝ նաև ԱՄԿ-ի ծովային իրավունքի կոնվենցիան։
Անհրաժեշտ է հասնել կիպրական խնդրի շուտափույթ ու բոլորի համար ընդունելի լուծմանը և Թուրքիայի ու Կիպրոսի հարաբերությունների կարգավորմանը։ Զսպվածությունն ապահովում է դրական մթնոլորտ, որը կնպաստի բանակցային գործընթացի հաջող ավարտին։ Այն չափազանց կարևոր է այս աշնանը կիպրական խնդրի կարգավորման շուրջ կայանալիք բանակցություններից առաջ»։
Հիշեցնենք, որ ներկայումս լուրեր են շրջանառվում, թե հոկտեմբերի 1-ին ամերիկյան Noble Energy ընկերությունը հորատման աշխատանքներ է սկսելու «Բլոկ-12» գազային հանքավայրում, որը գտնվում է բացառապես Իսրայելի և Կիպրոսի տնտեսական գոտում։ Այս կապակցությամբ թուրք պետնախարար, ԵՄ-ին Թուրքիայի անդամակցության գծով գլխավոր բանագնաց Էգեմեն Բաղըշը հայտարարել է, որ եթե Կիպրոսը «Բլոկ-12»-ում հորատում իրականացնի, ապա Թուրքիան դրան ռազմական պատասխան կտա։
Ավելի վաղ թուրքական կողմը սպառնացել էր սառեցնել ԵՄ-ի հետ հարաբերությունները, եթե մինչև 2012 թվականի ամառը (երբ Կիպրոսը ստանձնելու է ԵՄ-ի նախագահությունը) լուծում չստանա կիպրական հարցը։