Յուրաքանչյուր սերնդի ներկայացուցիչների թվում կան պրոֆեսիոնալներ և դիլետանտներ։ Այս մասին ԱԺ Մարդու իրավունքների պաշտպանության և հանրային հարցերի հանձնաժողովում «Մարդու իրավունքների պաշտպանությունը Երևանի քաղաքապետարանի գործունեության համատեքստում» թեմայով քննարկմանն ասել է Երևանի փոխքաղաքապետ Սուրեն Գրիգորյանը։
«Պրոֆեսիոնալիզմն ըստ սերունդների բաժանեցիք, սակայն յուրաքանչյուր սերնդի ներկայացուցիչների թվում կան պրոֆեսիոնալներ և դիլետանտներ։ Մի քննադատությունն այն է, որ նոր երիտասարդներն եկել են բանից անտեղյակ, հակառակ քննադատությունն էլ այն է, որ հին կադրեր են, տարիներով նստած են և ոչ մի փոփոխություն չեն ընկալում։ Ճշմարտություն երկուսում էլ կա, սա ոչ թե սերունդների, այլ անձանց մակարդակով է»,- նշել է նա։
Անդրադառնալով ընդհանուր բնույթի խնդիներին՝ փոխքաղաքապետն առանձնացրել է «ձգձգումների» թեման։
«Իրականում այն, որ քաղաքապետարանում՝ կոնկրետ ճարտարապետական ոլորտում, ինքնակամ շինությունների օրինականացման, շինթույլտվությունների ստացման մասով կան ժամկետների ձգձգումներ, դա այս ֆորմատով տեղեկացնելու կարիք չկա։ Մենք դրա մասին շատ լավ գիտենք, և այդ մասին յուրաքանչյուր երկուշաբթի հրապարակվում է գործավարական նիստերի ընթացքում։ Այսինքն՝ քաղաքապետարանն այդ խնդրի մասին տեղեկացված է։ Ավելին՝ կոնկրետ ճարտարապետական բլոկի մասով ամենշաբաթյա զեկույցներ են ներկայացվում»,- նշել է Սուրեն Գրիգորյանը։
Նա նաև խոսել է գործընկներների՝ կադաստրի մոդելով որոշակի մասնագետների լիցենզավորման առաջարկի մասին։
«Իրականում՝ դա շատ առողջ միտք է, որովհետև այսօր մի ամբողջ բազմաբնակարան շենք կառուցելու դիմում է գալիս քաղաքապետարան, որը, օրինակ, կարող է 30 տոկոսով կազմված լինել, քաղաքապետարանը պետք է դրա վրա աշխատի, որպեսզի թերությունները նշի, ինչը, կարող է, իդեալական չլինել։ Կարծում եմ, որ պետք է լինի ինստիտուտ, որը կծառայի որպես որոշակի ֆիլտր, և արդեն գրագետ պատրաստված նախագիծ կգա քաղաքապետարան»,- նշել է փոխքաղաքապետ։
Սուրեն Գրիգորյանը ներկայացրել է ՀԷՑ-ի օրինակը, երբ մի կողմի գործընթացները կարող են կախված լինել մյուսից՝ դա համարելով օրինաչափ։
«Օրինակ, ՀԷՑ-ն ունի պրոցեսներ, որոնք կախված ենք մեզանից, բայց կա նաև հակառակը, երբ մեզ են դիմում, մենք ենք որոշակի հարցում անում ՀԷՑ-ին։ Դրանք միմյանց հետ փոխկապակցված գործընթացներ են։ Բայց երբ քաղաքացին հարցնում է, թե ի՞նչ եղավ իմ դիմումը, արդար պատասխանն այն է, որ դիմել ենք ՀԷՑ-ին, սպասում ենք պատասխանի»,- նշել է Գրիգորյանը
