Իրանական Mehr գործակալության հաղորդմամբ, Իրանի տեղեկատվության կազմակերպության փոխտնօրեն Ալի Ասղար Անսարին հայտարարել է, որ արդեն մեկնարկել է «Իրանական Էլ-Փոստ» ծառայության աշխատանքները: Իրանի պաշտոնյայի փոխանցմամբ՝ այսուհետ Իրանի բոլոր քաղաքացիները պարտադիր պիտի օգտագործեն իրանական ազգային էլ-Փոստը:
Անսային տեղական էլ-փոստ ունենալու առավելություններից նշել է այն, որ օգտատերերի միջև փոխանակված տեղեկությունները միայն Իրանում են շրջանառվելու, հետևաբար ապահովվում է օգտատերերի տեղեկությունների անվտանգությունը:
Հիշեցնենք, որ ամիսներ առաջ էլ Իրանում խոսք եղավ «հալալ» և մաքուր ինտերնետի մասին. իրանական իշխանությունները ցանկություն էին հայտնել Իրանի համար ստեղծել սեփական ինտերնետի համակարգ՝ իր բոլոր ստորաբաժանումներով, միայն այն տարբերությամբ, որ պոռնո և նմանօրինակ կայքերը հասանելի չեն լինի իրանցի օգտատերերի համար:
Իրանի իշխանությունները 2009-ի նախագահական ընտրություններից հետո երկրում ծագած ժողովրդական բողոքի ցույցերից հետո երկրի ինտերնետը սահմանափակելու ու օգտատերերի փոխանակած տեղեկատվությունը խուզարկելու ուղղությամբ մեծ ջանքեր են թափում:
