Ադրբեջանական Vesti.az-ին տված հարցազրույցում ռուսական՝ Մերձավոր Արևելքի հետազոտման ինստիտուտի նախագահ Եվգենի Սատանովսկին անդրադարձել է թուրք-իսրայելական ճգնաժամին.
«Թուրքիայի ղեկավարությունը փորձում է նոր Օսմանյան կայսրություն կառուցել։ Իսլամական աշխարհում ճանաչման հասնելու համար կա երկու ճանապարհ. կամ վիթխարի գումարների միջոցով երկար տարիներ հսկայական աշխատանքներ տանել, կամ էլ դրան հասնել կարճատև ժամանակաշրջանում՝ վիրավորելով իսրայելցիներին, վատթարացնելով Իսրայելի հետ հարաբերությունները։
Եվրոպան ու Ամերիկան այսօր չեն մտնում Թուրքիայի առաջնահերթ նպատակների մեջ, Թուրքիան փորձում է իր տեղը զբաղեցնել իսլամական աշխարհում։ Թուրքիայի արտգործնախարար Ահմեդ Դավութօղլուի ցուցաբերած արմատական իսլամիզմն ակնհայտորեն անհրաժեշտ է Թուրքիայի այդ տեսակն առաջ տանելու համար։
«Գյուլ-Էրդողան-Դավութօղլու» թուրքական ղեկավար եռյակի քաղաքականությունը հանգեցրել է նրան, որ Իսրայելի հետ նախկին երկկողմանի գործընկերային հարաբերություններից ոչինչ չի մնացել։ Նոր Թուրքիան մեծ հավակնություններով երկիր է, նրա հավակնությունները հավասար են օսմանյան սուլթանների հավակնություններին։ Իսրայելի հետ ամուր համագործակցությունը չի տեղավորվում իշխող եռյակի քաղաքականության ուղեծրում։
Ես դեռևս նախորդ տարվա սեպտեմբերին եմ նշել, որ այդ ժամանակ Թուրքիայում տեղի ունեցավ աննկատ իսլամական հեղափոխություն։ Սահմանադրական բարեփոխումների շուրջ հանրաքվեն հանդիսացավ իսլամական հեղափոխության փափուկ ձևը։ Այլևս գոյություն չունի Քեմալ Աթաթուրքի Թուրքիան, որի հետ համագործակցում էր Իսրայելը։ Այժմ գոյություն ունի Էրդողանի Թուրքիան, որի դաշնակիցներն են «Հըզբոլլահ»-ը և «ՀԱՄԱՍ»-ը։ Թուրքիան այլ դաշնակիցների կարիք չունի։
Թուրքիայի գործողությունները վկայում են, թե նրա ղեկավարությունը որքան վատ է հասկանում շրջակա աշխարհում իր երկրի ռեալ վիճակը։ Դա հանգեցնելու է Թուրքիայի սնանկությանը։ Իսրայելը Թուրքիայի նահանգը չէ, որին ղեկավարում են Էրդողանի ծառաները։ Թուրքիան կորցրեց Իսրայելը, նրա ռազմական օգնությունը, նրա նորագույն տեխնոլոգիաները։ Թուրքիան այդ ամենի համար շատ ավելի թանկ կվճարի, քան այսօր կարելի է ենթադրել։ Թուրքիան ինքն է կատարել իր այդ ընտրությունը»։
