Ճի՞շտ էր արդյոք հերոսածին մայր Գայանե Հակոբյանին կալանավորելը, ինչն առաջացրեց հանրության ընդվզումը, ասուլիսի ժամանակ հետաքրքրվեցին լրագրողները՝ Հայաստանի վարչապետ Նիկոլ Փաշինյանից։ Ի պատասխան՝ Փաշինյանը հարց հնչեցրեց՝ ինչո՞վ հերոսածին մայր չէ իր կինը՝ Աննա Հակոբյանը․ նրանով, որ պատերազմում Աշոտ Փաշինյանը չի զոհվե՞լ։
Ապա Նիկոլ Փաշինյանը դրվագ պատմեց 44-օրյայից, որին իր որդի Աշոտ Փաշինյանը, ինչպես նա նշեց, մասնակցել է որպես կամավոր։
«Մարտական հերթապահության ժամանակ Աշոտ Փաշինյանը հրետակոծության կամ հրթիռակոծության տակ է ընկել իր ջոկի հետ։ Եվ այդ հրետակոծության կամ հրթիռակոծության ժամանակ իր ծառայակից ընկերը, որի հետ նրանք պատսպարված, մարմնով իրար կիպ կպած են եղել, զոհվել է։ Ես կարծում եմ, որ պարզ է բոլորիս, որ ոչ ոք որոշում չի կայացրել, որ Աշոտ Փաշինյանը պետք է չզոհվի, ոչ ոք։ Ես ուզում եմ մի հարց տալ՝ եթե այդ բեկորը սպաներ Աշոտ Փաշինյանին, նա կլիներ հերոս, իսկ եթե չի սպանել այդ բեկորը և միլիմետրերով անցել է իր կողքով, նա դառնում է հակահերո՞ս։
