Այսօր լրագրողների հետ հանդիպմանը «Սարդարապատ» խմբի նախաձեռնող անդամ Ալեք Ենիգոմշյանը, խոսելով բանակում կատարված դեպքերի, դրանց կանխարգելմանն ուղղված՝ հասարակության դերի մասին, նշեց. «Ասեմ, որ, այն գնահատականը, որ բանակը հասարակության հայելին է, ճիշտ է, բայց այն, որ եղածը կարելի է արդարացնել, ճիշտ չէ:
Պատճառը տիրող համակարգն է և այդ համակարգը ծնող վարչակարգը: Բանակի ստորին շարքերում, շարքային զինվորների հարթության վրա հասարակության ներսում տիրող մթնոլորտն է, իսկ վերնախավում տիրում է հասարակության վերնախավի կաշառակերության, զոռբայության մթնոլորտը: Յուրաքանչյուր անհատ իր անելիքն ունի, բայց ինչպես ամբողջ պետության ներսում հնարավոր չէ իրավիճակը փոխել առանց համակարգափոխության, այնպես էլ բանակի ներսում այդ ախտերը չեն բուժվի»:
Նա նաև հավելեց, որ պակասել է մեզանում ներդաշնակությունը՝ մարդ-մարդ, մարդ-բնություն հարաբերություններում. «Վստահաբար կարող եմ ասել, որ մենք անհուսալի վիճակում չենք, «Սարարապատ»-ը վստահ է, որ մեր ներուժը շրջադարձ է կատարելու, և մենք մեր անկախությունը նվաճելու ենք»:
Ենիգոմշյանը նաև հավաստեց, որ «Սարարապատ»-ը չի գոհանում եղածը քննադատելով, զբաղվում է բոլոր ոլորտներին առնչվող՝ մեր երազած պետականության հայեցակարգի պատրաստությամբ. «ՀՀ երրորդ հանրապետությունը ավարտին է հասնում, մենք հասնելու ենք չորրորդ հանրպետությանը: Իշխանափոխությունը ժողովրդի ուժով պիտի կատարվի, մենք մերժում ենք ընտրությունների միջոցով իշխանափոխությունը: Վստահ եմ, որ դիմադրության շնորհիվ ժողովրդին հաջողվելու է կատարել իշխանափոխություն և հիմք դնել նոր ու առողջ համակարգի»:
