Այսօր ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահ Հրայր Կարապետյանը աշխատանքային հանդիպում էր կազմակերպել պատգամավորների, ՀՀ պաշտպանության նախարարության տարբեր ծառայությունների ղեկավարների, ՊՆ նախարարին կից հասարակական խորհրդի նախագահի, ՀՀ մարդու իրավունքների պաշտպանի գրասենյակի, ԵԱՀԿ երևանյան գրասենյակի, մի շարք իրավապաշտպան հասարակական կազմակերպությունների ներկայացուցիչների մասնակցությամբ` քննարկելու բանակում նկատվող մտահոգիչ խնդիրները և դրանց վերաբերող կանխարգելիչ միջոցառումների ընթացքը:
Քննարկմանը ներկա «Թրանսփարենսի ինթերնեշնլ» ՀԿ նախագահ Սոնա Այվազյանը «Առաջին լրատվականի» հետ զրույցում նշեց, որ հնչած ելույթները մի տեսակ ինքնապաշտպանական, ինքնարդարացման ելույթներ էին.
«Մի տեսակ չզգացվեց, որ իրենք մտահոգ էին ու ինչ-որ բան ուզում էին փոխել, մենք այդպիսի տպավորություն, համենայնդեպս, չստացանք: Տպավորությունն այնպիսին էր, որ փորձում էին ամեն կերպ բացատրել, ոչ թե արդարացնել, այլ բացատրել, թե ինչու է այսպես, բացատրել, որ իրենք այդքան գործ են անում, որ վիճակագրությունը դեպի նվազեցում է գնում և այլն»:
Նա նաև նշեց, որ իրավապաշտպան ՀԿ-ները մյուս չորեքշաբթի կլոր սեղան են հրավիրել բոլոր շահագրգիռ կողմերին, որի ժամանակ էլ, ըստ Ս. Այվազյանի, կհնչեն առաջարկներ, ապա հավելեց. «Այսօրվա քննարկմանը ուզում էին ասել, որ վատ է իրավիճակը, բայց կարող էր ավելի վատ լինել»:
