Օրերս ԱԺ պետական-իրավական հարցերի մշտական հանձնաժողովի նիստում ՀՀ գլխավոր դատախազ Աննա Վարդապետյանը հայտարարել է, որ երկու գործ կա, որ պաշտոնն ստանձնելուց հետո, նախ՝ որպես ՀՀ քաղաքացի, ապա նաև որպես նոր գլխավոր դատախազ, եղել են իր առաջնահերթությունները: Դա «Մարտի 1»-ն է և «Հոկտեմբերի 27-ը»:
Քանի որ ֆիզիկապես պաշտոնավարում է մոտ վեց ամիս, և ժամկետների խնդիրներ ունեն, այժմ ծանոթացել և զբաղվում է «Մարտի 1»-ի գործով:
«Մարտի 1-ի հետապնդումների հետ կապված ամենշաբաթյա ռեժիմով ինձ մոտ քննարկվում և զեկուցվում է: «Հոկտեմբերի 27»-ի գործը դեռ ինքս չեմ հասցրել կարդալ և ուսումնասիրել, բայց ուզում եմ վերահաստատել, որ որպես ՀՀ քաղաքացի, ինձ համար առաջնային են այս երկու գործերը»,- հավելել է նա: Վարդապետյանը նշել է, որ առաջիկայում կսկսեն նաև «Հոկտեմբերի 27»-ի գործի քննությունը:
Այս առնչությամբ փաստաբան Ալեքսանդր Սիրունյանը «Առաջին լրատվական»-ի հետ զրույցում նշեց, որ այդ երկու գործերով էլ վաղեմության ժամկետն անցել է. «Եթե այսօր Քոչարյանը, Բիլ Գեյթսը կամ Ժամ Շիրակը գան ասեն՝ այո՛, դա մենք ենք արել, դրա վաղեմության ժամկետն էլ է անցել: Հիմա ուզում եմ հասկանալ, որ այս բլոնդինկան, որ այսպես ֆիքստուլավարի քայլեր է անում ու ասում՝ իմ հսկողության տակ է, ի՞նչն է քո հսկողության տակ, գործեր, որոնց վաղեմության ժամկետը անցե՞լ է: Մարտի 1-ը դրել մինչև վերջ «փչացրել» եք արել: Այն, որ դու չես հասկանում, թե որտեղ ես աշխատում, մենք դա արդեն պարզեցինք այս ամիսների ընթացքում: Ի՞նչն է քո հսկողության տակ: Հեղափոխությունից անցել է ուղիղ 5 տարի, ի՞նչ արեցիք էդ գործերով, ժողովուրդ ջան: Ի՞նչ պարզեցիք, ի՞նչ գտաք: Հիշում եմ՝ բարձր ամբիոններից ասում էին՝ ամբողջովին բացահայտված է մարտի 1-ը, բա եթե բացահայտված է, ինչու մինչև հիմա մարդ չի դատվել: Հիմա չի էլ կարող դատվել, որովհետև վաղեմության ժամկետներն անցել են»,-ասաց նա:
Հարցին, թե այս ամենը ականջ ու աչք շոյելու համա՞ր են անում, որն իրականում ժողովրդի աչքին թոզ փչոցի՞ է, փաստաբանը դրական պատասխան տվեց. «Ես ուղղակի դրան չեմ ուզում հավատալ, դրա համար իրեն եմ ասում՝ աղջիկ ջան, նույնիսկ Աղվանի ժամանակ չէր կարող լինել այսպիսի մեղադրանք, որ մարդուն մեղադրեն կովի լեղապարկի քարը որպես կաշառք ստանալու մեջ»:
