Սպորտային հագուստի և աքսեսուարների հայտնի արտադրող Lacoste-ը խնդրել է նորվեգական ոստիկանությանը արգելել ահաբեկիչ Անդերս Բրեյվիկին կրել այդ ընկերության կողմից արտադրված հագուստ: Այս մասին հաղորդում են նորվեգական լրատվամիջոցները:
Բրեյվիկին ձերբակալելուց հետո նրան արգելել էին կրել նրա սիրած զինվորական համազգեստը, դրանից հետո նա մի քանի նկարներում հայտնվել է կարմիր կամ սև պուլովերով, որի վրա նշմարվում է Lacoste ընկերության հայտնի տարբերանշանը` կանաչ կոկորդիլոսը: Lacoste-ի փաստաբանը պահանջը ներկայացրել է ոստիկանությանը` ասելով, որ դրանով Բրեյվիկը «բացասական գովազդ է տարածում հանրահայտ ընկերության վերաբերյալ»: Հայտնի է նաև, որ Բրեյվիկն իր գրառումներում նշում է, թե ֆրանսիական ապրանքանիշն իրեն «պահպանողական, կրթված եվրոպացու տեսք է հաղորդում»:
